തിരുവനന്തപുരം/കോഴിക്കോട്: സംസ്ഥാനത്ത് നിയമസഭാ ഉപതിരഞ്ഞെടുപ്പിനുള്ള പത്രികാസമർപ്പണം നാളെ അവസാനിക്കാനിരിക്കെ, രാഷ്ട്രീയ ഗോദയെ ചൂടുപിടിപ്പിച്ച് പ്രതിപക്ഷ നേതാവ് വി.ഡി. സതീശന്റെ 'വോട്ട് ഡീൽ' ആരോപണം. പാലക്കാട് ഉൾപ്പെടെ പത്തോളം മണ്ഡലങ്ങളിൽ സി.പി.എമ്മും ബി.ജെ.പിയും തമ്മിൽ രഹസ്യ ധാരണയുണ്ടെന്ന സതീശന്റെ പ്രസ്താവനയ്ക്കെതിരെ ഭരണപക്ഷവും ബി.ജെ.പിയും രംഗത്തെത്തിയതോടെ വാശിയേറിയ രാഷ്ട്രീയപ്പോരിനാണ് കേരളം സാക്ഷ്യം വഹിക്കുന്നത്.

​ആരോപണവുമായി യു.ഡി.എഫ്

​ മാധ്യമങ്ങൾക്ക് നൽകിയ അഭിമുഖത്തിലാണ് വി.ഡി. സതീശൻ ഡീൽ ആരോപണം ഉന്നയിച്ചത്. പത്ത് മണ്ഡലങ്ങളിൽ ഇരു പാർട്ടികളും തമ്മിൽ വോട്ട് കച്ചവടത്തിന് ധാരണയായെന്ന് അദ്ദേഹം ആരോപിച്ചു. എ.ഐ.സി.സി ജനറൽ സെക്രട്ടറി കെ.സി. വേണുഗോപാലും കെ.പി.സി.സി മുൻ പ്രസിഡന്റ് കെ. സുധാകരനും സമാനമായ ആരോപണങ്ങളുമായി സതീശന് പിന്തുണ പ്രഖ്യാപിച്ചു.

​തിരിച്ചടിച്ച് ബി.ജെ.പി

​പരാജയ ഭീതി പൂണ്ട പ്രതിപക്ഷ നേതാവ് അസംബന്ധം വിളിച്ചു പറയുകയാണെന്ന് ബി.ജെ.പി സംസ്ഥാന പ്രസിഡന്റ് രാജീവ് ചന്ദ്രശേഖർ പ്രതികരിച്ചു.
​"സി.പി.എം ഒരു മുങ്ങുന്ന കപ്പലാണ്. അതിലേക്ക് ബി.ജെ.പിയെ കൂട്ടിക്കെട്ടാൻ നോക്കേണ്ട. 27 സംസ്ഥാനങ്ങളിൽ ബി.ജെ.പിക്കെതിരെ മുന്നണിയായി മത്സരിക്കുന്നവരാണ് കോൺഗ്രസും സി.പി.എമ്മും. പിന്നെങ്ങനെയാണ് കേരളത്തിൽ മാത്രം ഡീലുണ്ടാകുന്നത്?" - അദ്ദേഹം ചോദിച്ചു.

​പുച്ഛിച്ചു തള്ളി സി.പി.എം
​ആരോപണങ്ങളെ പുച്ഛത്തോടെ തള്ളുന്നുവെന്നാണ് സി.പി.എം സംസ്ഥാന സെക്രട്ടറി എം.വി. ഗോവിന്ദൻ വ്യക്തമാക്കിയത്. ബി.ജെ.പിയുമായി ഡീലുണ്ടെങ്കിൽ പാലക്കാട്ട് എന്തിനാണ് എൽ.ഡി.എഫ് ശക്തനായ സ്ഥാനാർത്ഥിയെ നിർത്തിയതെന്നും അദ്ദേഹം ചോദിച്ചു. യഥാർത്ഥത്തിൽ ഡീൽ ഉറപ്പിക്കുന്നത് പ്രതിപക്ഷ നേതാവാണെന്ന് സി.പി.എം പൊളിറ്റ് ബ്യൂറോ അംഗം വിജയരാഘവനും കുറ്റപ്പെടുത്തി.

​പാലക്കാട് ബി.ജെ.പി സ്ഥാനാർത്ഥി ശോഭ സുരേന്ദ്രനും സതീശന്റെ പ്രസ്താവനയ്ക്കെതിരെ രംഗത്തെത്തി. പ്രതിപക്ഷ നേതാവ് ബി.ജെ.പിയുടെ വിജയം ഉറപ്പിച്ചു കഴിഞ്ഞു എന്നതിന്റെ സൂചനയാണിതെന്നായിരുന്നു ശോഭയുടെ പ്രതികരണം.

​പത്രികാസമർപ്പണം പൂർത്തിയാകുന്നതോടെ വരും ദിവസങ്ങളിൽ ഈ 'ഡീൽ' രാഷ്ട്രീയം വോട്ടെടുപ്പ് പ്രചാരണത്തിലെ പ്രധാന ആയുധമായി മാറുമെന്ന് ഉറപ്പായി.
​