​ദോഹ: പ്രകൃതിയുടെ പച്ചപ്പും കടലിന്റെ നീലിമയും കാത്തുസൂക്ഷിക്കുമെന്ന ഉറച്ച പ്രഖ്യാപനത്തോടെ ലോക ഭൗമദിനത്തിൽ വേറിട്ട മാതൃകയുമായി ഓൾഡ് ദോഹ പോർട്ട്. സമുദ്ര പരിസ്ഥിതിയുടെ സംരക്ഷണം, മാലിന്യ നിർമ്മാർജ്ജനം, കടൽത്തട്ടുകളുടെ ശുചീകരണം എന്നിവയിൽ ഊന്നിയുള്ള വിപുലമായ പദ്ധതികളാണ് തുറമുഖ അധികൃതർ ഭൂമി ദിനത്തോടനുബന്ധിച്ച് അവതരിപ്പിച്ചത്.2023-ൽ തുടക്കം കുറിച്ച ഓൾഡ് ദോഹ പോർട്ടിന്റെ അഭിമാന പദ്ധതിയായ 'സീബെഡ് ക്ലീനിംഗ്' (Seabed Cleaning) ഇപ്പോൾ നാലാം വർഷത്തിലേക്ക് കടന്നിരിക്കുകയാണ്. പ്രൊഫഷണൽ ഡൈവർമാരുടെയും വിവിധ സർക്കാർ-സ്വകാര്യ ഏജൻസികളുടെയും സഹകരണത്തോടെ കടലിന്റെ ആഴങ്ങളിൽ അടിഞ്ഞുകൂടിയ പ്ലാസ്റ്റിക്കുകൾ, ഉപേക്ഷിക്കപ്പെട്ട വലകൾ, മറ്റ് അവശിഷ്ടങ്ങൾ എന്നിവ നീക്കം ചെയ്യുന്ന പ്രവർത്തനമാണിത്. ആറ് മീറ്റർ വരെ ആഴത്തിലുള്ള മാലിന്യങ്ങൾ നീക്കം ചെയ്യുന്നതിലൂടെ സമുദ്രജീവികളുടെ സുരക്ഷയും സുഗമമായ കപ്പൽ ഗതാഗതവുമാണ് ലക്ഷ്യമിടുന്നത്.സമുദ്ര മലിനീകരണത്തിന്റെ പ്രധാന കാരണമായ എണ്ണച്ചോർച്ചകൾ (Oil Spills) നേരിടാൻ അത്യാധുനിക സജ്ജീകരണങ്ങളാണ് പോർട്ടിൽ ഒരുക്കിയിരിക്കുന്നത്. വെള്ളത്തിന് മുകളിൽ എണ്ണ പടരുന്നത് തടയാനുള്ള ഫ്ലോട്ടിംഗ് ബാരിയറുകൾ, അത്യാധുനിക ശുചീകരണ ഉപകരണങ്ങൾ, വിദഗ്ധ പരിശീലനം ലഭിച്ച ദ്രുതകർമ്മ സേന എന്നിവ ഏത് അടിയന്തര സാഹചര്യവും നേരിടാൻ സജ്ജമാണ്.തുറമുഖത്തെത്തുന്ന ബോട്ടുകളിൽ നിന്നും മറ്റ് സമുദ്ര വാഹനങ്ങളിൽ നിന്നുമുള്ള മാലിന്യങ്ങൾ നീക്കം ചെയ്യാൻ കർശനമായ നിയന്ത്രണങ്ങളാണ് ഏർപ്പെടുത്തിയിരിക്കുന്നത്.ഖത്തർ നാഷണൽ വിഷൻ 2030-ന്റെ ഭാഗമായി സുസ്ഥിര വിനോദസഞ്ചാരവും പരിസ്ഥിതി സംരക്ഷണവും മുൻനിർത്തിയാണ് ഈ പ്രവർത്തനങ്ങൾ ഏകോപിപ്പിക്കുന്നത്. ഖത്തറിന്റെ സമുദ്ര പൈതൃകത്തെ വരുംതലമുറയ്ക്കായി കാത്തുസൂക്ഷിക്കാനുള്ള പ്രതിബദ്ധതയാണ് ഈ ഭൗമദിനത്തിൽ ഓൾഡ് ദോഹ പോർട്ട് വീണ്ടും അടിവരയിടുന്നത്.