പി വി എ നാസർ
ദോഹ: പകൽച്ചൂടിന്റെ കാഠിന്യമേറുമ്പോഴും, കുളിർക്കാറ്റേശുന്ന സായന്തനങ്ങളെ വരവേൽക്കാൻ ദോഹയിലെ ജനങ്ങൾ ഒന്നടങ്കം ഒഴുകിയെത്തുകയാണ് വർണ്ണാഭമായ കപ്പൽത്തുറമുഖമായ 'ഓൾഡ് ദോഹ പോർട്ടി'ലേക്ക്!.എല്ലാ കാലങ്ങൾക്കും ഇണങ്ങിയ ഖത്തറിന്റെ പ്രിയപ്പെട്ട വിനോദസഞ്ചാര കേന്ദ്രം ഇന്നലെയും ജനനിബിഡമായിരുന്നു.
സാംസ്കാരിക-കായിക-സമുദ്ര പരിപാടികളുടെ ഊർജ്ജസ്വലമായ വേദിയായ ഇവിടം, നാനാതുറകളിൽ പെട്ട ജനങ്ങളുടെ പ്രധാന ഒത്തുചേരൽ കേന്ദ്രമായി മാറിയിരിക്കുകയാണ്. പാരമ്പര്യത്തിന്റെ തനിമ ചോരാതെ നിർമ്മിച്ച കൽപ്പാകിയ മനോഹരമായ തെരുവുകളും, പച്ചപ്പ് നിറഞ്ഞ പാർക്കുകളുമാണ് സഞ്ചാരികളെ ഇങ്ങോട്ട് ആകർഷിക്കുന്നത്.
ചൂട് വർദ്ധിച്ചുവരുന്ന സാഹചര്യത്തിലും, വൈകുന്നേരങ്ങളിൽ സുഹൃത്തുക്കൾക്കും കുടുംബാംഗങ്ങൾക്കുമൊപ്പം ഗുണനിലവാരമുള്ള സമയം ചിലവഴിക്കാൻ പ്രവാസികളും സ്വദേശികളും ഉൾപ്പെടെ വലിയൊരു ജനക്കൂട്ടമാണ് ഇവിടെയെത്തുന്നത്. അസ്തമയ സൂര്യന്റെ പൊൻകിരണങ്ങൾ കടലിൽ പ്രതിഫലിക്കുന്ന മനോഹരമായ കാഴ്ചയും ആസ്വദിച്ച്, കല്ലുപാകിയ വഴികളിലൂടെയുള്ള കാൽനടയാത്ര ജനങ്ങൾക്ക് വേറിട്ടൊരു അനുഭൂതിയാണ് സമ്മാനിക്കുന്നത്. വേനൽച്ചൂടിനെ മറന്ന് ദോഹയുടെ ഹൃദയമിടിപ്പായി ഓൾഡ് ദോഹ പോർട്ട് വീണ്ടും തിളങ്ങിനിൽക്കുന്നു.
