ലണ്ടൻ: പശ്ചിമേഷ്യയിലെ സംഘർഷം ആഗോള എണ്ണവിപണിയിൽ വീണ്ടും ആശങ്ക പടർത്തുന്നു. വിതരണ തടസ്സങ്ങൾ ഉണ്ടാകുമെന്ന ഭീതിയിൽ ബ്രെന്റ് ക്രൂഡ് ഓയിൽ വില ബാരലിന് 116.20 ഡോളറിലേക്ക് ഉയർന്നു. 2022 ജൂണിന് ശേഷമുള്ള ഏറ്റവും ഉയർന്ന വിലയാണിത്. ലോകത്തെ പ്രധാന എണ്ണ ഉൽപ്പാദന മേഖലയിൽ നിന്നുള്ള വിതരണം തടസ്സപ്പെട്ടേക്കുമെന്ന ആശങ്കയാണ് വിപണിയിലെ കുതിപ്പിന് പിന്നിൽ.

സൗദി അറേബ്യയിൽ ഹൂത്തികൾ നടത്തിയ ആക്രമണങ്ങൾ സ്ഥിതിഗതികൾ കൂടുതൽ സങ്കീർണമാക്കിയിട്ടുണ്ട്. സംഘർഷം എണ്ണ ഉൽപ്പാദനത്തെയും കടൽമാർഗമുള്ള ചരക്കുനീക്കത്തെയും ബാധിക്കുമെന്ന ആശങ്ക നിക്ഷേപകരിലും വ്യാപാരികളിലും ശക്തമാണ്. അമേരിക്കൻ ക്രൂഡ് ഓയിൽ വിലയിലും വർധന രേഖപ്പെടുത്തി. വെസ്റ്റ് ടെക്സസ് ഇന്റർമീഡിയറ്റ് (WTI) വില 1.7 ശതമാനം ഉയർന്ന് ബാരലിന് 101.12 ഡോളറിലെത്തി. തുടർച്ചയായ മൂന്നാം ആഴ്ചയാണ് ബ്രെന്റ് ക്രൂഡ് വില ഉയരുന്നത്.

സുരക്ഷാ ആശങ്കകൾക്കിടെ സൗദി എണ്ണക്കമ്പനിയായ അരാംകോ ധാഹ്റാനിലെ ആസ്ഥാനത്തുനിന്ന് ജീവനക്കാരെ ഒഴിപ്പിക്കാൻ വ്യാഴാഴ്ച നിർദേശം നൽകിയിരുന്നു. സൗദി അറേബ്യയും യമനിലെ ഹൂത്തികളും തമ്മിലുള്ള ഏറ്റുമുട്ടൽ രൂക്ഷമായ സാഹചര്യത്തിലാണ് നടപടി.

എണ്ണവിതരണത്തെ ബാധിക്കാവുന്ന മറ്റൊരു നിർണായക മേഖലയാണ് ബാബ് എൽ-മന്ദബ് കടലിടുക്ക്. ചെങ്കടലിനെയും ഏഡൻ ഉൾക്കടലിനെയും ബന്ധിപ്പിക്കുന്ന ഈ കടൽപ്പാതയിലെ ഗതാഗതം തടസ്സപ്പെട്ടാൽ ചരക്കുകൾ ലക്ഷ്യസ്ഥാനത്തെത്താൻ വൈകുകയും കപ്പൽഗതാഗത ചെലവ് വർധിക്കുകയും ചെയ്യും. ഇത് അന്താരാഷ്ട്ര വിപണിയിൽ എണ്ണയുടെ ലഭ്യതയെയും വിലയെയും ബാധിക്കാനിടയുണ്ട്.

പശ്ചിമേഷ്യയിലെ സംഘർഷം കൂടുതൽ വ്യാപിച്ചാൽ വിതരണ ശൃംഖലയിലുണ്ടാകുന്ന ആഘാതം എണ്ണവില വീണ്ടും ഉയരാൻ കാരണമാകുമെന്ന് യു.ബി.എസ് അനലിസ്റ്റ് ജിയോവന്നി സ്റ്റൗനോവോ മുന്നറിയിപ്പ് നൽകി. മേഖലയിലെ സുരക്ഷാ സാഹചര്യം എങ്ങനെ മാറുന്നു എന്നതിനെ ആശ്രയിച്ചായിരിക്കും വരും ദിവസങ്ങളിൽ എണ്ണവിലയുടെ ഗതി.