ദോഹ: ഖത്തർ ആഭ്യന്തര മന്ത്രാലയം നൽകുന്ന വിവിധ ഔദ്യോഗിക രേഖകൾ ക്യു-പോസ്റ്റ് (Q-Post) വഴി അയക്കുമ്പോൾ, അവയുടെ തത്സമയ വിവരങ്ങൾ അറിയാൻ മെട്രാഷ് 2 (Metrash2) ആപ്ലിക്കേഷനിലെ 'ക്യു-പോസ്റ്റ് ട്രാക്കിംഗ്' (QPost Tracking) സേവനം പ്രയോജനപ്പെടുത്താമെന്ന് മന്ത്രാലയം അറിയിച്ചു. പൊതുജനങ്ങൾക്ക് സേവനങ്ങൾ കൂടുതൽ വേഗത്തിലും സുതാര്യമായും ലഭ്യമാക്കുന്നതിന്റെ ഭാഗമായാണ് ഈ ഓർമ്മപ്പെടുത്തൽ.മെട്രാഷ് 2 വഴി അപേക്ഷിച്ച പാസ്‌പോർട്ട്, ഖത്തർ ഐഡി (QID), ഡ്രൈവിംഗ് ലൈസൻസ് തുടങ്ങിയ രേഖകൾ പോസ്റ്റൽ വഴിയാണ് വരുന്നത് എങ്കിൽ, അവ നിലവിൽ എവിടെ എത്തി എന്ന് ആപ്പിലൂടെ തന്നെ പരിശോധിക്കാം.ഉപഭോക്താക്കൾക്ക് തങ്ങളുടെ രേഖകൾക്കായി ഖത്തർ പോസ്റ്റ് ഓഫീസുകളിലോ മന്ത്രാലയത്തിന്റെ ഓഫീസുകളിലോ നേരിട്ട് പോയി അന്വേഷിക്കേണ്ട സാഹചര്യം ഒഴിവാക്കുകയാണ് ലക്ഷ്യം.മെട്രാഷ് 2 വഴി ലഭ്യമാകുന്ന 220-ലധികം സേവനങ്ങളിൽ ഏറ്റവും കൂടുതൽ ജനങ്ങൾ ഉപയോഗിക്കുന്ന ഒന്നായി ഈ ട്രാക്കിംഗ് സംവിധാനം മാറിയിട്ടുണ്ട്. സ്മാർട്ട് സിറ്റി പദ്ധതിയുടെ ഭാഗമായി ഡിജിറ്റൽ സേവനങ്ങൾ വ്യാപിപ്പിക്കുന്നതിന്റെ നടപടിയാണിതെന്ന് മന്ത്രാലയം വ്യക്തമാക്കി.
