സർക്കാർ ആശുപത്രിയിൽ നഴ്സിനെ കഴുത്തറുത്ത് കൊലപ്പെടുത്തി. മധ്യപ്രദേശിലെ നർസിംഗ്പുർ ജില്ലാ ആശുപത്രിയിൽ ഇന്നലെ വൈകിട്ട് മൂന്നു മണിയോടെയാണ് സംഭവം. ഇരുപത്തിമൂന്നുകാരിയായ സന്ധ്യ ചൗധരിയാണ് കൊല്ലപ്പെട്ടത്. ജില്ലാ ആശുപത്രിയിലെ ട്രെയിനി നഴ്സാണ് കൊല്ലപ്പെട്ട യുവതി.
ആശുപത്രിയിൽ ആളുകൾ നോക്കിനിൽക്കെയാണ് കത്തിയുമായി എത്തിയ യുവാവ് നഴ്സിന്റെ കഴുത്തറുത്തത്. സന്ധ്യയുമായി ബന്ധമുണ്ടായിരുന്ന യുവാവാണ് യുവതിയെ കൊലപ്പെടുത്തിയത് എന്നാണ് പൊലീസിന്റെ പ്രാഥമിക നിഗമനം. കൊലപാതകത്തിന് പിന്നാലെ ഒളിവിൽ പോയ ഇയാൾക്കായി അന്വേഷണം ഊർജ്ജിതമാണെന്നും പൊലീസ് വ്യക്തമാക്കി.
സംഭവം നടക്കുമ്പോൾ താൻ ഓഫിസിലായിരുന്നെന്നും ആളുകളുടെ നിലവിളി കേട്ടാണ് ഓടിയെത്തിയതെന്നും ജില്ലാ ആശുപത്രി സിവിൽ സർജൻ ഡോ. ജിസി ചൗരസ്യ പറഞ്ഞു. പ്രതിയെ പിടികൂടാനുള്ള എല്ലാ ശ്രമങ്ങളും തുടരുകയാണെന്ന് കോട്വാലി പൊലീസ് സ്റ്റേഷൻ ഇൻ-ചാർജ് ഗൗരവ് ഘാട്ടെ പറഞ്ഞു.
