​തിരുവനന്തപുരം: പാചകവാതക വിലക്കയറ്റവും ക്ഷാമവും സാധാരണക്കാരന്റെ പോക്കറ്റ് ചോർത്താൻ തുടങ്ങിയതോടെ, മലയാളിയുടെ അടുക്കളകൾ വീണ്ടും പുകഞ്ഞുതുടങ്ങി. ആധുനിക സാങ്കേതിക വിദ്യകളോട് പൊരുത്തപ്പെട്ട പുതുതലമുറ  പോലും ഇപ്പോൾ സ്മാർട്ട്ഫോൺ മാറ്റിവെച്ച് അടുപ്പൂതി തീ കത്തിക്കാനുള്ള പരിശ്രമത്തിലാണ്. പുകയും കരിയുമില്ലാത്ത 'മോഡേൺ' അടുക്കളകളിൽ നിന്ന് വിറകടുപ്പുകൾ വർക്ക് ഏരിയയിലേക്കും അവിടെനിന്ന് വീണ്ടും പ്രധാന അടുക്കളയിലേക്കും തിരിച്ചെത്തുകയാണ്.

​പുതുതലമുറയും വിറകടുപ്പും

​വിറക് ശേഖരിച്ചും കൈകൾ കൊണ്ട് ചാരം വാരിയും അടുപ്പിന്റെ 'സൗന്ദര്യം' ആസ്വദിക്കുകയാണ് ഇന്നത്തെ യുവത്വം. വിശപ്പ് മാറണമെങ്കിൽ കരിയും പുകയുമുള്ള വിറകടുപ്പ് തന്നെ ശരണം എന്ന അവസ്ഥയാണിപ്പോൾ. ഗ്യാസ് അടുപ്പിലെ ഭക്ഷണത്തേക്കാൾ വിറകടുപ്പിൽ വേവിച്ചെടുക്കുന്ന വിഭവങ്ങൾക്ക് രുചി കൂടുതലാണെന്ന് പുതിയ പിള്ളേരും സമ്മതിക്കുന്നു.

​വിറകിനും മരപ്പൊടിക്കും വൻ ഡിമാൻഡ്

​പാചകവാതകം സർവ്വവ്യാപിയായതോടെ വിറക് കച്ചവടം ഏതാണ്ട് നിലച്ച മട്ടായിരുന്നു. മരക്കടകളിലെ മരപ്പൊടി ആർക്കും വേണ്ടാതെ കിടന്നിരുന്ന കാലം മാറി. ഇപ്പോൾ മരപ്പൊടിക്കും വിറകിനും ഡിമാൻഡ് കുതിച്ചുയരുകയാണ്. മെഷീൻ ഉപയോഗിച്ച് കീറിയെടുത്ത വിറകിന് കിലോയ്ക്ക് 20 മുതൽ 30 രൂപ വരെയാണ് നിലവിലെ വില.

​ഹോട്ടലുടമകൾ പ്രതിസന്ധിയിൽ

​ഗ്യാസിന്റെ വരവോടെ വിറകടുപ്പുകൾ പൂർണ്ണമായും തട്ടിക്കളഞ്ഞ ഹോട്ടലുടമകളാണ് ഇപ്പോൾ ഏറ്റവും വലിയ കെണിയിലായിരിക്കുന്നത്. "മുതലാളീ, വിറകടുപ്പ് കളയരുത്" എന്ന് പ്രായമായ തൊഴിലാളികൾ അന്ന് പറഞ്ഞത് കേൾക്കാത്തവർ ഇന്ന് ഖേദിക്കുന്നു. ഇൻഡക്ഷൻ കുക്കറുകൾ ഉപയോഗിച്ചാൽ കറണ്ട് ബില്ല് 'ഷോക്കടിപ്പിക്കും' എന്നതിനാൽ വിറകിലേക്ക് മടങ്ങുകയല്ലാതെ മറ്റ് മാർഗ്ഗമില്ല.

​അടുപ്പുകൾ ഇനി ഓൺലൈനിൽ

​വിറകടുപ്പുകളുടെ കച്ചവടം ഇപ്പോൾ ഓൺലൈൻ സൈറ്റുകളിൽ സജീവമാണ്. പ്രധാനമായും മൂന്ന് തരം അടുപ്പുകൾക്കാണ് ആവശ്യക്കാർ ഏറുന്നത്:

​മരപ്പൊടി അടുപ്പുകൾ: 500 രൂപയ്ക്ക് ലഭിച്ചിരുന്ന ഇത്തരം അടുപ്പുകൾക്ക് ഇപ്പോൾ 1,000 രൂപയ്ക്ക് മുകളിലാണ് വില. മണിക്കൂറുകളോളം കത്തുന്ന ചെറിയ അടുപ്പുകൾക്ക് വൻ ഡിമാൻഡാണ്.

​വിറകടുപ്പുകൾ: ഹോട്ടലുകൾക്കും വീടുകൾക്കും അനുയോജ്യമായ സ്റ്റീൽ/അയൺ അടുപ്പുകൾ ഓൺലൈനിൽ ലഭ്യമാണ്. 950 മുതൽ 1,500 രൂപ വരെയാണ് ഇതിന്റെ വില.

​കളിമൺ അടുപ്പുകൾ: നാട്ടിൻപുറങ്ങളിൽ നിർമ്മിക്കുന്ന സാധാരണ മൺ അടുപ്പുകൾക്ക് 250 രൂപയ്ക്ക് മുകളിലാണ് വില ഈടാക്കുന്നത്.
​ചുരുക്കത്തിൽ, ഹൈടെക് അടുക്കളകളെ പുകമറയിലാക്കി വിറകടുപ്പുകൾ തന്റെ പഴയ പ്രതാപം വീണ്ടെടുത്തിരിക്കുകയാണ്.