തിരുവനന്തപുരം: എഐ ക്യാമറ പിഴനോട്ടീസുകളിലെ ചിത്രങ്ങൾ ദുരുപയോഗം ചെയ്യുന്നതായി പരാതികൾ ഉയർന്നതോടെ ഇ-ചെല്ലാൻ പോർട്ടലിൽ നിർണായക മാറ്റം. ഇനി വാഹനത്തിന്റെ രജിസ്ട്രേഷൻ നമ്പർ മാത്രം ഉപയോഗിച്ച് പിഴയുമായി ബന്ധപ്പെട്ട ചിത്രങ്ങൾ പരിശോധിക്കാനോ ഡൗൺലോഡ് ചെയ്യാനോ കഴിയില്ല. വാഹന ഉടമയുടെ അനുമതിയോടെയായിരിക്കും ചിത്രങ്ങൾ പരിശോധിക്കാൻ സാധിക്കുക.
വാഹനത്തിന്റെ രജിസ്ട്രേഷൻ വിവരങ്ങൾ ഉൾപ്പെടെയുള്ള വിശദാംശങ്ങൾ നൽകിയാണ് ഇനി പിഴയുടെ ചിത്രങ്ങൾ പരിശോധിക്കേണ്ടത്. അതേസമയം, പിഴ ചുമത്തിയതായി ലഭിക്കുന്ന എസ്എംഎസിലെ ചെല്ലാൻ നമ്പർ ഉപയോഗിച്ചും പിഴയുടെ വിവരങ്ങൾ പരിശോധിക്കാം.
ഇ-ചെല്ലാൻ പോർട്ടൽ വഴിയാണ് വിവരങ്ങൾ ലഭ്യമാകുക.
സ്വകാര്യത സംരക്ഷിക്കാൻ നിയന്ത്രണം
എഐ ക്യാമറകൾ പകർത്തുന്ന ദൃശ്യങ്ങളിലെ സ്വകാര്യത ഉറപ്പാക്കുന്നതിന്റെ ഭാഗമായാണ് പുതിയ നിയന്ത്രണം. നേരത്തെ വാഹനത്തിന്റെ രജിസ്ട്രേഷൻ നമ്പർ ലഭിച്ചാൽ ഏതൊരു വാഹനത്തിന്റെയും പിഴ വിവരങ്ങൾ പരിശോധിക്കാനും നിയമലംഘനത്തിന്റെ ചിത്രങ്ങൾ ഡൗൺലോഡ് ചെയ്യാനും സാധിച്ചിരുന്നു.
ഈ സൗകര്യം ദുരുപയോഗം ചെയ്യുന്നതായി പരാതികൾ ഉയർന്നതോടെയാണ് നടപടി. പ്രത്യേകിച്ച് സ്ത്രീകളുടെ ഉടമസ്ഥതയിലുള്ള വാഹനങ്ങളുടെ പിഴ വിവരങ്ങൾ തിരഞ്ഞെടുത്ത് ചിത്രങ്ങൾ കണ്ടെത്തുകയും പിന്നീട് അവ സാമൂഹിക മാധ്യമങ്ങളിൽ പ്രചരിപ്പിക്കുകയും ചെയ്ത സംഭവങ്ങൾ പരാതിക്ക് ഇടയാക്കിയിരുന്നു.
കൺട്രോൾ റൂമുകളിൽനിന്ന് അയയ്ക്കുന്ന നിയമലംഘനത്തിന്റെ ചിത്രങ്ങളും ചില കുടുംബങ്ങളിൽ അസ്വാരസ്യങ്ങൾക്ക് കാരണമായതായി അധികൃതരുടെ ശ്രദ്ധയിൽപ്പെട്ടിരുന്നു. വാഹനത്തിനുള്ളിലെ യാത്രക്കാരുടെ ദൃശ്യങ്ങൾ ഉൾപ്പെടുന്ന ചിത്രങ്ങൾ കുടുംബാംഗങ്ങൾക്ക് ലഭിച്ചതിനെ തുടർന്നുണ്ടായ തർക്കങ്ങളും ഇതിന് പിന്നാലെയുണ്ടായി.
പിഴ ശരിയാണോ എന്ന് പരിശോധിക്കാനും ചിത്രം വേണം
എന്നാൽ എഐ ക്യാമറ പിഴകളുമായി ബന്ധപ്പെട്ട ചിത്രങ്ങൾ പൂർണമായും രഹസ്യമാക്കാനും കഴിയില്ല. പിഴ ചുമത്തിയത് ശരിയാണോ എന്ന് വാഹന ഉടമയ്ക്ക് പരിശോധിക്കാനും തെറ്റായ പിഴയാണെങ്കിൽ പരാതി നൽകാനും ദൃശ്യങ്ങൾ ആവശ്യമാണ്.
വ്യാജ നമ്പർപ്ലേറ്റുകൾ ഉപയോഗിച്ച് വാഹനങ്ങൾ നിരത്തിലിറക്കുന്ന സംഭവങ്ങളും റിപ്പോർട്ട് ചെയ്യപ്പെടുന്നുണ്ട്. ഇതുമൂലം യഥാർഥ വാഹന ഉടമയുടെ വാഹനം വീട്ടിൽ കിടക്കുമ്പോഴും അതിന്റെ പേരിൽ പിഴനോട്ടീസ് ലഭിക്കുന്ന സാഹചര്യമുണ്ടാകാം. ഇത്തരം കേസുകളിൽ ചിത്രങ്ങൾ പരിശോധിക്കുന്നത് നിർണായകമാണ്.
പിഴ ചുമത്തിയതിൽ പരാതിയുണ്ടെങ്കിൽ ഇ-ചെല്ലാൻ പരാതി പോർട്ടൽ വഴി പരാതി നൽകാം.
പൊതുസ്ഥലങ്ങളിൽ നടക്കുന്ന ഗതാഗത നിയമലംഘനങ്ങൾ ക്യാമറയിൽ പകർത്തുന്നതിന് അനുമതിയുണ്ടെങ്കിലും, അതോടൊപ്പം വ്യക്തികളുടെ സ്വകാര്യത സംരക്ഷിക്കണമെന്ന വ്യവസ്ഥയും പാലിക്കണമെന്നതാണ് പുതിയ സംവിധാനത്തിന്റെ ലക്ഷ്യം.
