ആലപ്പുഴ/തിരുവനന്തപുരം: നവകേരള യാത്രയ്ക്കിടെ യൂത്ത് കോൺഗ്രസ് നേതാക്കളെ മുഖ്യമന്ത്രിയുടെ ഗൺമാൻമാർ ക്രൂരമായി മർദ്ദിച്ച സംഭവം വീണ്ടും രാഷ്ട്രീയ-നിയമ വൃത്തങ്ങളിൽ കൊടുങ്കാറ്റാകുന്നു. ഗൺമാൻമാർക്കെതിരെയുള്ള പോലീസ് അന്വേഷണം അന്നത്തെ എ.ഡി.ജി.പി ഇടപെട്ട് അട്ടിമറിച്ചെന്ന ഞെട്ടിക്കുന്ന മൊഴികളാണ് ഇപ്പോൾ പുറത്തുവന്നിരിക്കുന്നത്. ക്രൈംബ്രാഞ്ച് എസ്.പി ഷൗക്കത്തലിയുടെ നേതൃത്വത്തിലുള്ള പ്രത്യേക അന്വേഷണ സംഘത്തിന് (SIT) മുന്നിലാണ് ആദ്യ അന്വേഷണം നടത്തിയ ഉദ്യോഗസ്ഥർ നിർണായക വെളിപ്പെടുത്തലുകൾ നടത്തിയത്.
​തിരുവനന്തപുരത്ത് വിളിച്ചുവരുത്തി ഫയലുകൾ തിരുത്തിച്ചു
​ആലപ്പുഴ സൗത്ത് പോലീസ് നടത്തിയ പ്രാഥമിക അന്വേഷണ വിവരങ്ങൾ കേസ് ഡയറിയിൽ കൃത്യമായി രേഖപ്പെടുത്തിയിരുന്നു. എന്നാൽ ക്രമസമാധാന ചുമതലയുണ്ടായിരുന്ന അന്നത്തെ ഉന്നത ഉദ്യോഗസ്ഥൻ അന്വേഷണസംഘത്തെ തലസ്ഥാനത്തേക്ക് വിളിച്ചുവരുത്തി സി.ഡി (Case Diary) ഫയൽ നിർബന്ധപൂർവ്വം തിരുത്തിക്കുകയായിരുന്നു എന്ന് ക്രൈംബ്രാഞ്ച് ഡി.വൈ.എസ്.പി, എസ്.ഐ, മറ്റ് പോലീസുകാർ എന്നിവർ മൊഴി നൽകി.
​യഥാർത്ഥ റിപ്പോർട്ട്: 'ഡ്യൂട്ടിക്കിടയിൽ ഗൺമാൻമാർ നടത്തിയ മർദ്ദനം' എന്ന് രേഖപ്പെടുത്തി.
​തിരുത്തിയ റിപ്പോർട്ട്: 'മർദ്ദിക്കുന്ന വീഡിയോ ദൃശ്യങ്ങൾ കണ്ടിട്ടില്ല' എന്ന് മാറ്റി എഴുതിച്ചു.
​തെളിവില്ലെന്ന് ചൂണ്ടിക്കാട്ടി മുൻപ് അന്വേഷണം അവസാനിപ്പിച്ചത് ഈ അട്ടിമറിയുടെ ഭാഗമായാണെന്ന് കണ്ടെത്തിയിട്ടുണ്ട്. ഈ വിവരങ്ങൾ അടങ്ങിയ പ്രത്യേക റിപ്പോർട്ട് എസ്.ഐ.ടി ഉടൻ തന്നെ ഡി.ജി.പിക്ക് കൈമാറും.
​പൂഴ്ത്തിവച്ച റിപ്പോർട്ടും സ്ഥലംമാറ്റവും:
ഗൺമാൻമാർക്കെതിരെ നടപടിക്ക് ശുപാർശ ചെയ്തുകൊണ്ട് അന്നത്തെ എസ്.പി ചൈത്ര തെരേസാ ജോൺ സമർപ്പിച്ച റിപ്പോർട്ട് ആഭ്യന്തര വകുപ്പ് പൂഴ്ത്തിവെക്കുകയായിരുന്നു. ഇതിന് പിന്നാലെ ചൈത്ര തെരേസയെ കൊല്ലത്തേക്ക് സ്ഥലം മാറ്റുകയും ചെയ്തു.
​അന്ന് ന്യായീകരണം, ഇന്ന് കുടുക്ക്
​2023 ഡിസംബറിലാണ് കേരളത്തെ പിടിച്ചുലച്ച സംഭവം നടന്നത്. മുഖ്യമന്ത്രിയുടെ അകമ്പടി വാഹനത്തിൽ നിന്നിറങ്ങിവന്ന ഗൺമാൻമാരായ അനിൽ കുമാറും സന്ദീപും ചേർന്ന് യൂത്ത് കോൺഗ്രസ് നേതാക്കളെ ക്രൂരമായി മർദ്ദിക്കുകയായിരുന്നു.
​ഇരകൾ: നിലവിലെ എം.എ.എ എ.ഡി. തോമസ്, യൂത്ത് കോൺഗ്രസ് സംസ്ഥാന സെക്രട്ടറി അജയ് ജുവൽ കുര്യാക്കോസ്.
​'രക്ഷാപ്രവർത്തന' വാദം: സുരക്ഷ ഉറപ്പാക്കാനുള്ള ഗൺമാൻമാരുടെ ശ്രമം മാത്രമാണിതെന്നും അത് 'രക്ഷാപ്രവർത്തന'മാണെന്നുമാണ് മുഖ്യമന്ത്രി പിണറായി വിജയൻ അന്ന് പരസ്യമായി ന്യായീകരിച്ചത്. തുടർന്ന് മർദ്ദനമേറ്റ നേതാക്കൾ കോടതിയെ സമീപിച്ചതോടെയാണ് കേസ് എടുക്കാൻ പോലീസ് നിർബന്ധിതരായത്.
​സാക്ഷികളെ ഭീഷണിപ്പെടുത്തി; ദൃശ്യങ്ങൾ ഫോറൻസിക്കിലേക്ക്
​സംഭവത്തിന്റെ ദൃശ്യങ്ങൾ പകർത്തിയ പ്രധാന സാക്ഷിയും ജയ്ഹിന്ദ് ടി.വി ക്യാമറാമാനുമായ ജോജിമോന്റെ മൊഴി ആലപ്പുഴ ക്രൈംബ്രാഞ്ച് വിശദമായി രേഖപ്പെടുത്തി. ദൃശ്യങ്ങൾ കാണിച്ച് പ്രതികളെ തിരിച്ചറിഞ്ഞിട്ടുണ്ട്.
​പകർത്തിയ ദൃശ്യങ്ങൾ കോടതിയിൽ സമർപ്പിച്ച വേളയിൽ മൊഴി മാറ്റാൻ തനിക്ക് മേൽ ശക്തമായ ഭീഷണിയുണ്ടായിരുന്നതായി ജോജിമോൻ വെളിപ്പെടുത്തി. ജോജിയുടെ ഫോൺ നിലവിൽ പോലീസ് കസ്റ്റഡിയിലാണ്. ദൃശ്യങ്ങളുടെ ആധികാരികത ഉറപ്പുവരുത്താൻ തിരുവനന്തപുരത്തെ സ്റ്റേറ്റ് ഫോറൻസിക് ലാബിലേക്ക് അയച്ചിരിക്കുകയാണ്. പരിശോധനാഫലം വേഗത്തിൽ ലഭ്യമാക്കാൻ അന്വേഷണസംഘം ആവശ്യപ്പെട്ടിട്ടുണ്ട്.
​എം.എൽ.എയുടെ മൊഴി ഇന്ന്; ഒരു പ്രതിയെ പിൻവലിച്ചു
​മർദ്ദനത്തിനിരയായ ആലപ്പുഴ എം.എൽ.എ എ.ഡി. തോമസിന്റെയും അജയ് ജുവൽ കുര്യാക്കോസിന്റെയും മൊഴികൾ പ്രത്യേക അന്വേഷണസംഘം ഇന്ന് രേഖപ്പെടുത്തും. ഇതിന് ശേഷം പ്രതികളായ ഗൺമാൻമാരെ ചോദ്യം ചെയ്യും.
​അതേസമയം, പിണറായി വിജയന്റെ ഇസഡ് കാറ്റഗറി സുരക്ഷ പിൻവലിച്ചതോടെ പ്രതിയായ ഗൺമാൻ സന്ദീപിനെ പോലീസ് സേനയിലേക്ക് തിരിച്ചുവിളിച്ചിട്ടുണ്ട്. എന്നാൽ രണ്ടാം പ്രതിയായ സുരക്ഷാ ഉദ്യോഗസ്ഥൻ അനിൽ കുമാർ ഇപ്പോഴും പിണറായിക്കൊപ്പം തുടരുകയാണ്. പുതിയ വെളിപ്പെടുത്തലുകളുടെ പശ്ചാത്തലത്തിൽ ഗൺമാൻമാർക്കെതിരെ ഉടൻ കടുത്ത നടപടിയുണ്ടാകുമെന്നാണ് സൂചന.