കൊച്ചി: യാത്രക്കാരൻ ട്രെയിനിൽ നിന്നിറങ്ങി റെയിൽവേ ട്രാക്കിലൂടെ നടക്കുന്നതിനിടെ മറ്റൊരു ട്രെയിൻ തട്ടി മരിച്ചാൽ റെയിൽവേ നിയമപ്രകാരം നഷ്ടപരിഹാരത്തിന് അർഹതയില്ലെന്ന് കേരള ഹൈക്കോടതി. റെയിൽവേ ക്ലെയിംസ് ട്രിബ്യൂണൽ പരേതന്റെ മക്കൾക്ക് നഷ്ടപരിഹാരം അനുവദിച്ച് നൽകിയ ഉത്തരവ് ജസ്റ്റിസ് എസ്. മനു റദ്ദാക്കി.
മാവേലി എക്സ്പ്രസിൽ യാത്ര ചെയ്തിരുന്ന ഒരാൾ പിന്നീട് റെയിൽവേ ട്രാക്കിലൂടെ നടക്കുന്നതിനിടെ അന്ത്യോദയ എക്സ്പ്രസ് തട്ടിയാണ് മരിച്ചത്. ഈ മരണം യാത്രക്കാരൻ സഞ്ചരിച്ച ട്രെയിനുമായി ബന്ധപ്പെട്ട ഒരു 'അനിഷ്ട സംഭവ'ത്തിന്റെ പരിധിയിൽ വരുന്നതല്ലെന്ന് കോടതി നിരീക്ഷിച്ചു.
റെയിൽവേ ട്രാക്കിലൂടെ നടക്കുന്നത് അതിക്രമിച്ചുകയറലായി കണക്കാക്കുമെന്നും ഇത് റെയിൽവേ നിയമപ്രകാരം കുറ്റകരമാണെന്നും കോടതി ചൂണ്ടിക്കാട്ടി. ഈ സാഹചര്യത്തിൽ, മരിച്ചയാളുടെ നിയമപരമായ അവകാശികൾക്ക് റെയിൽവേയിൽ നിന്ന് നഷ്ടപരിഹാരം ലഭിക്കാൻ അർഹതയില്ലെന്ന് കോടതി വിധിച്ചു.
കേസ് ഡയറി: 2026 (Ker) 378
