ദോഹ: വിശുദ്ധ റമദാൻ പ്രമാണിച്ച് രാജ്യത്തെ സർക്കാർ സ്‌കൂളുകളുടെയും കിൻഡർഗാർട്ടനുകളുടെയും (കെ.ജി) പുതിയ പ്രവർത്തന സമയം വിദ്യാഭ്യാസ ഉന്നത വിദ്യാഭ്യാസ മന്ത്രാലയം (MoEHE) പ്രഖ്യാപിച്ചു. പുതിയ സമയക്രമം അനുസരിച്ച് വിദ്യാർഥികൾക്ക് പ്രതിദിനം മൂന്നര മണിക്കൂർ മാത്രമായിരിക്കും ക്ലാസുകൾ ഉണ്ടായിരിക്കുക.
കിൻഡർഗാർട്ടനുകൾ മുതൽ പന്ത്രണ്ടാം ക്ലാസ് വരെയുള്ള എല്ലാ സർക്കാർ സ്‌കൂളുകളും റമദാനിൽ രാവിലെ 9 മണിക്ക് പ്രവർത്തനം ആരംഭിച്ച് ഉച്ചയ്ക്ക് 12.30-ന് അവസാനിക്കും. വിദ്യാർഥികളുടെ പഠനഭാരം കുറയ്ക്കുന്നതിനും റമദാനിലെ പ്രത്യേക സാഹചര്യം പരിഗണിച്ചുമാണ് ഈ ക്രമീകരണം.
അധ്യാപകർക്കും മറ്റ് ജീവനക്കാർക്കും പ്രതിദിനം നാല് മണിക്കൂർ ജോലി സമയമായിരിക്കും നിശ്ചയിച്ചിട്ടുള്ളത്. ഇവർ രാവിലെ 9 മണി മുതൽ ഉച്ചയ്ക്ക് 1 മണി വരെ സ്‌കൂളുകളിൽ ഹാജരാകണം. റമദാൻ മാസത്തിലെ പ്രാർഥനകൾക്കും കുടുംബത്തോടൊപ്പം സമയം ചെലവഴിക്കുന്നതിനും അനുയോജ്യമായ രീതിയിലാണ് മന്ത്രാലയം ഈ സമയക്രമം വിഭാവനം ചെയ്തിരിക്കുന്നത്.സ്വകാര്യ സ്‌കൂളുകൾക്ക് മന്ത്രാലയത്തിന്റെ പൊതുനിർദേശങ്ങൾ പാലിച്ച് സ്വന്തം നിലയ്ക്ക് സമയക്രമത്തിൽ ചെറിയ മാറ്റങ്ങൾ വരുത്താൻ അനുവാദം നൽകിയിട്ടുണ്ട്
