ന്യൂഡല്ഹി: മുല്ലപ്പെരിയാര് അണക്കെട്ടുമായി ബന്ധപ്പെട്ട വിഷയങ്ങള് പരിഗണിക്കാന് പുതിയ മേല്നോട്ട സമിതിക്ക് രൂപം നൽകി കേന്ദ്രസർക്കാർ. ദേശീയ ഡാം സുരക്ഷാ അതോറിറ്റി ചെയര്മാൻ അധ്യക്ഷനായുള്ള സമിതിക്കാണ് കേന്ദ്രസർക്കാർ രൂപംകൊടുത്തിരിക്കുന്നത്. സുരക്ഷാകാര്യങ്ങളുമായി ബന്ധപ്പെട്ട വിഷയങ്ങള് ദേശീയ ഡാം സുരക്ഷാ അതോറിറ്റിയാകും ഇനി പരിഗണിക്കുക. ജല കമ്മിഷന്റെ ചെയര്മാന് അധ്യക്ഷനായ സമിതിക്കായിരുന്നു നേരത്തേ മുല്ലപ്പെരിയാർ ഡാമിന്റെ മേൽനോട്ട ചുമതല.
കേന്ദ്ര ജലശക്തി മന്ത്രാലയമാണ് പുതിയ മേല്നോട്ട സമിതിക്ക് രൂപം കൊടുത്തുള്ള ഉത്തരവ് പുറപ്പെടുവിച്ചിരിക്കുന്നത്. മുല്ലപ്പെരിയാര് അണക്കെട്ടിന്റെ സുരക്ഷ ഉള്പ്പെടെയുള്ള വിഷയങ്ങള് ഡാം സുരക്ഷാ അതോറിറ്റിക്ക് കൈമാറുമെന്ന് നേരത്തെ കേന്ദ്ര ജല കമ്മിഷന് സുപ്രീം കോടതിയെ അറിയിച്ചിരുന്നു. ഇതിന്റെ അടിസ്ഥാനത്തിലാണ് ഡാം സുരക്ഷാ അതോറിറ്റിക്ക് മുല്ലപ്പെരിയാര് അണക്കെട്ടിന്റെ സുരക്ഷാ കാര്യങ്ങള് കൈമാറിക്കൊണ്ടുള്ള ഉത്തരവ്.
