05:21am 17 November 2026
NEWS
ബെവ്‌കോ ഔട്ട്ലെറ്റുകളിൽ അടിമുടി മാറ്റം; പുതിയ മദ്യനയം ഉടൻ പ്രഖ്യാപിച്ചേക്കും
16/11/2026  12:18 PM IST
nila
ബെവ്‌കോ ഔട്ട്ലെറ്റുകളിൽ അടിമുടി മാറ്റം; പുതിയ മദ്യനയം ഉടൻ പ്രഖ്യാപിച്ചേക്കും

 

സംസ്ഥാനത്തിന്റെ പുതിയ മദ്യനയം ഉടൻ പ്രഖ്യാപിച്ചേക്കുമെന്ന് സൂചന. ഇതുമായി ബന്ധപ്പെട്ട നിർദേശങ്ങൾ ഈ ആഴ്ച തന്നെ മുഖ്യമന്ത്രി വി.ഡി. സതീശന്റെ പരിഗണനയ്ക്ക് എത്തിയേക്കും. പുതിയ നയം നടപ്പാകുന്നതോടെ ബെവ്‌കോ ഔട്ട്ലെറ്റുകളുടെ പ്രവർത്തനരീതിയിലും അടിസ്ഥാന സൗകര്യങ്ങളിലും കാര്യമായ മാറ്റങ്ങൾ കൊണ്ടുവരാനാണ് സർക്കാർ ആലോചിക്കുന്നത്.

ഔട്ട്ലെറ്റുകളുടെ എണ്ണം വർധിപ്പിക്കുന്നതിന് പകരം നിലവിലുള്ളവയുടെ രൂപഘടനയും വിൽപ്പന സംവിധാനവും പരിഷ്കരിക്കാനാണ് നീക്കം. ഇതിന്റെ ഭാഗമായി സെൽഫ് ഹെൽപ് മാതൃകയിലുള്ള ഔട്ട്ലെറ്റുകൾക്ക് കൂടുതൽ പ്രാധാന്യം നൽകും. ഉപഭോക്താക്കൾക്ക് നേരിട്ട് ഉൽപ്പന്നങ്ങൾ തിരഞ്ഞെടുത്ത് വാങ്ങാൻ കഴിയുന്ന രീതിയിലുള്ള സംവിധാനങ്ങൾ വ്യാപിപ്പിക്കാനാണ് ലക്ഷ്യമിടുന്നത്.

ബെവ്‌കോ ഔട്ട്ലെറ്റുകളുടെയും വെയർഹൗസുകളുടെയും നടത്തിപ്പ് ആവശ്യമായ സാഹചര്യങ്ങളിൽ സഹകരണ സംഘങ്ങൾക്ക് കൈമാറുന്നതും പരിഗണനയിലുണ്ട്. ചില്ലറ മദ്യവിൽപ്പന മേഖലയിലും സഹകരണ സംഘങ്ങളുടെ പങ്കാളിത്തം ഉറപ്പാക്കാനുള്ള സാധ്യത പരിശോധിക്കുന്നുണ്ട്.

പരമ്പരാഗത കള്ളുചെത്ത് മേഖലയിലും സമഗ്രമായ പരിഷ്കരണത്തിനാണ് നീക്കം. അതേസമയം, വീര്യം കുറഞ്ഞ മദ്യത്തിന്റെ കാര്യത്തിൽ അന്തിമ നയപരമായ തീരുമാനം യുഡിഎഫ് ഉപസമിതിയുടെ ചർച്ചകൾക്ക് ശേഷമായിരിക്കുമെന്നാണ് സൂചന.

പുതിയ മദ്യനയം നിലവിൽ വരുന്നതുവരെ ബാറുകൾക്ക് പുതിയ ലൈസൻസ് അനുവദിക്കേണ്ടതില്ലെന്നാണ് നികുതി വകുപ്പിന്റെ നിലപാട്. സർക്കാരിന്റെ വ്യക്തമായ നിർദേശം ലഭിക്കാതെ മദ്യവിൽപ്പനയ്ക്കുള്ള ലൈസൻസുകൾ അനുവദിക്കരുതെന്ന് അഡീഷണൽ ചീഫ് സെക്രട്ടറി ബന്ധപ്പെട്ട ഉദ്യോഗസ്ഥർക്ക് കർശന നിർദേശം നൽകിയിട്ടുണ്ട്.

പുതിയ നയത്തിന്റെ പ്രഖ്യാപനത്തോടെ സംസ്ഥാനത്തെ മദ്യവിൽപ്പന സംവിധാനത്തിലും ലൈസൻസ് നടപടികളിലും കൂടുതൽ മാറ്റങ്ങൾ ഉണ്ടാകുമെന്നാണ് പ്രതീക്ഷിക്കുന്നത്.

ഇവിടെ പോസ്റ്റുചെയ്യുന്ന അഭിപ്രായങ്ങള്‍ കേരളശബ്‌ദത്തിന്റേതല്ല . അഭിപ്രായങ്ങളുടെ പൂര്‍ണ്ണ ഉത്തരവാദിത്വം രചയിതാവിനായിരിക്കും. കേന്ദ്ര സർക്കാരിന്റെ ഐ.ടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളൂം നടത്തുന്നത് ശിക്ഷാര്‍ഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്.
KERALA
img