ദോഹ: ഡ്രോണുകളുടെ ഉപയോഗം ക്രമീകരിക്കുന്നതിനായുള്ള പുതിയ നിയമനിർമ്മാണത്തിന് ഖത്തർ ശൂറാ കൗൺസിൽ തുടക്കം കുറിച്ചു. സ്പീക്കർ ഹസ്സൻ ബിൻ അബ്ദുള്ള അൽ ഗാനിമിന്റെ അധ്യക്ഷതയിൽ നടന്ന യോഗത്തിൽ, ഡ്രോണുകളുടെ പ്രവർത്തനവും സുരക്ഷാ മാനദണ്ഡങ്ങളും ഉറപ്പാക്കുന്നതിനുള്ള കരട് നിയമം വിശദമായി ചർച്ച ചെയ്തു.
രാജ്യത്തിന്റെ സുരക്ഷയ്ക്കും സ്വകാര്യതയ്ക്കും ഭംഗം വരാത്ത രീതിയിൽ ഡ്രോണുകൾ ഉപയോഗിക്കുന്നുവെന്ന് ഉറപ്പാക്കുകയാണ് പുതിയ നിയമത്തിന്റെ ലക്ഷ്യം. സാങ്കേതിക വശങ്ങളും സുരക്ഷാ നടപടികളും കൂടുതൽ ആഴത്തിൽ പഠിച്ച് റിപ്പോർട്ട് സമർപ്പിക്കുന്നതിനായി ബില്ല് കൗൺസിലിന്റെ ആഭ്യന്തര-വിദേശകാര്യ സമിതിക്ക് കൈമാറി.
കെട്ടിട ഉടമകളുടെ അസോസിയേഷനുകളുടെ (Owners' Association) പ്രവർത്തനങ്ങളെ സംബന്ധിച്ച നിയമഭേദഗതിയും യോഗത്തിന്റെ പരിഗണനയ്ക്ക് വന്നു. റിയൽ എസ്റ്റേറ്റ് മേഖലയിലെ സുതാര്യതയും ഉടമസ്ഥാവകാശ തർക്കങ്ങളും പരിഹരിക്കാൻ ലക്ഷ്യമിട്ടുള്ള ബില്ലാണിത്. ഇത് സംബന്ധിച്ച റിപ്പോർട്ട് ലീഗൽ ആൻഡ് ലെജിസ്ലേറ്റീവ് അഫയേഴ്‌സ് കമ്മിറ്റി സമർപ്പിച്ചുവെങ്കിലും, കൂടുതൽ വ്യക്തത ആവശ്യമായതിനാൽ പുനഃപരിശോധനയ്ക്കായി സമിതിക്ക് തന്നെ തിരിച്ചയച്ചു.
അന്താരാഷ്ട്ര പാർലമെന്ററി വേദികളിൽ ഖത്തർ നടത്തിയ ഇടപെടലുകളെക്കുറിച്ചുള്ള റിപ്പോർട്ടുകളും യോഗം വിലയിരുത്തി. രാജ്യത്തിന്റെ സാങ്കേതികവും സാമൂഹികവുമായ വളർച്ചയ്ക്ക് കരുത്തേകുന്ന നിയമനിർമ്മാണങ്ങൾ വരും ദിവസങ്ങളിലും തുടരുമെന്നാണ് സൂചന
