വാഷിങ്ടൺ: ഇസ്രയേൽ പ്രധാനമന്ത്രി ബെന്യാമിൻ നെതന്യാഹുവിനെ അമേരിക്കയിൽ ഒരിടത്തും അറസ്റ്റ് ചെയ്യില്ലെന്ന് യുഎസ് പ്രസിഡന്റ് ഡൊണാൾഡ് ട്രംപ് വ്യക്തമാക്കി. ന്യൂയോർക്ക് സന്ദർശനത്തിനിടെ നെതന്യാഹുവിനെതിരെ നിയമനടപടികൾ സ്വീകരിക്കാനാകുമോയെന്ന ചർച്ചകൾക്കിടെയാണ് ട്രംപ് നിലപാട് വ്യക്തമാക്കിയത്.
ഐക്യരാഷ്ട്രസഭ ജനറൽ അസംബ്ലിയിൽ പങ്കെടുക്കാനായി സെപ്റ്റംബറിൽ നെതന്യാഹു ന്യൂയോർക്കിലെത്താനിരിക്കുകയാണ്. ഈ സാഹചര്യത്തിൽ, രാജ്യാന്തര ക്രിമിനൽ കോടതി യുദ്ധക്കുറ്റങ്ങൾ ചുമത്തിയ നേതാവെന്ന നിലയിൽ അദ്ദേഹത്തെ അറസ്റ്റ് ചെയ്യാൻ നിയമപരമായ സാധ്യതകളെക്കുറിച്ച് വിദഗ്ധരുമായി ചർച്ച നടത്തുകയാണെന്ന് ന്യൂയോർക്ക് സിറ്റി മേയർ സൊഹ്‌റാൻ മംദാനി അടുത്തിടെ ഒരു പോഡ്കാസ്റ്റിൽ പറഞ്ഞിരുന്നു.
ഇതിന് പിന്നാലെയാണ് ട്രംപ് ട്രൂത്ത് സോഷ്യൽ പ്ലാറ്റ്ഫോമിലൂടെ പ്രതികരിച്ചത്. മേയറെ പേരെടുത്ത് വിമർശിക്കാതെയായിരുന്നു പ്രതികരണമെങ്കിലും, അമേരിക്കൻ മണ്ണിൽ നെതന്യാഹുവിന്റെ അറസ്റ്റ് ഉൾപ്പെടെയുള്ള നടപടികൾക്ക് ഇടയില്ലെന്ന് അദ്ദേഹം വ്യക്തമാക്കി.
മേയറുടെ പരാമർശം രാഷ്ട്രീയ തലത്തിൽ വ്യാപക ചർച്ചയ്ക്ക് വഴിവെച്ചിരിക്കുകയാണ്. നെതന്യാഹുവിന്റെ യുഎൻ സന്ദർശനം അടുത്തിരിക്കെ വിഷയത്തിൽ അമേരിക്കൻ ഭരണകൂടത്തിന്റെ നിലപാടാണ് ട്രംപ് വ്യക്തമാക്കിയത്.
