കാഠ്മണ്ഡു: നേപ്പാളിൽ ഭോട്ടെകോശി നദി കരകവിഞ്ഞതിനെ തുടർന്ന് ഉണ്ടായ മിന്നൽപ്രളയത്തിൽ മരണസംഖ്യ 170 ആയി ഉയർന്നു. ദുരന്തത്തിൽ 800ലേറെ പേരെ കാണാതായി. കാണാതായവരിൽ 466 പേർ വിനോദസഞ്ചാരികളാണെന്നാണ് നേപ്പാൾ സർക്കാരിന്റെ വിവരം.

ദുരന്തത്തിൽ 105 ഇന്ത്യൻ പൗരന്മാരെ കാണാതായതായി വിദേശകാര്യ മന്ത്രാലയം സ്ഥിരീകരിച്ചു. തമിഴ്നാട്ടിൽനിന്ന് നേപ്പാളിലേക്ക് പോയ 37 പേരെക്കുറിച്ചും വിവരമില്ല. ഇഷ ഫൗണ്ടേഷൻ വഴി നേപ്പാളിലെത്തിയ 77 പേരുമായും ഇതുവരെ ബന്ധപ്പെടാനായിട്ടില്ല.

നേപ്പാൾ ടൂറിസം ബോർഡിന്റെ കണക്കനുസരിച്ച് 384 വിനോദസഞ്ചാരികളെയാണ് നിലവിൽ കാണാതായതായി റിപ്പോർട്ട് ചെയ്തിരിക്കുന്നത്. ദുരന്തത്തിൽ നിരവധി കെട്ടിടങ്ങൾ തകർന്നു. 19 പാലങ്ങളും 40 കിലോമീറ്ററോളം റോഡുകളും പൂർണമായി നശിച്ചതായാണ് വിവരം.

നേപ്പാൾ സൈന്യത്തിന്റെ നേതൃത്വത്തിൽ ദുരന്തബാധിത മേഖലകളിൽ അടിയന്തര രക്ഷാപ്രവർത്തനം ഊർജിതമായി തുടരുകയാണ്. കാണാതായവർക്കായി തിരച്ചിലും രക്ഷാപ്രവർത്തനവും യുദ്ധകാലാടിസ്ഥാനത്തിലാണ് പുരോഗമിക്കുന്നത്.

ടിബറ്റൻ മേഖലയിൽ 4.4 തീവ്രത രേഖപ്പെടുത്തിയ ഭൂചലനത്തെ തുടർന്ന് ഉണ്ടായ ഹിമപാതമാണ് ഭോട്ടെകോശി നദിയിലെ ജലനിരപ്പ് പെട്ടെന്ന് ഉയരാനും മിന്നൽപ്രളയത്തിനും കാരണമായതെന്നാണ് നേപ്പാൾ ഭരണകൂടത്തിന്റെ വിശദീകരണം.

ഇന്ത്യയിലും ജാഗ്രത

നേപ്പാളിലെ മിന്നൽപ്രളയത്തിന്റെ പശ്ചാത്തലത്തിൽ ഇന്ത്യയിലെ ഉത്തർപ്രദേശ്, ബിഹാർ സംസ്ഥാനങ്ങളിലെ നദീതീരങ്ങളിൽ ജാഗ്രതാ നിർദേശം പുറപ്പെടുവിച്ചു. നേപ്പാളിൽ നിന്നുള്ള ജലപ്രവാഹം വർധിക്കാനുള്ള സാധ്യത കണക്കിലെടുത്താണ് മുൻകരുതൽ നടപടി.

മലയാളികൾക്കായി ഹെൽപ് ഡെസ്ക്

നേപ്പാളിലെ പ്രളയബാധിത പ്രദേശങ്ങളിൽ മലയാളികൾ ഉൾപ്പെട്ടിട്ടുണ്ടോ എന്ന് പരിശോധിക്കാൻ മുഖ്യമന്ത്രി ചീഫ് സെക്രട്ടറിയെ ചുമതലപ്പെടുത്തി. നേപ്പാളിൽ കുടുങ്ങിക്കിടക്കുന്ന മലയാളികൾക്കും അവരുടെ ബന്ധുക്കൾക്കും സഹായം നൽകുന്നതിനായി നോർക്ക റൂട്ട്സ് പ്രത്യേക ഹെൽപ് ലൈൻ സംവിധാനവും ഏർപ്പെടുത്തി.

സഹായത്തിനായി നോർക്കയുടെ 1070 എന്ന ടോൾ ഫ്രീ നമ്പറിൽ ബന്ധപ്പെടാം. വിദേശകാര്യ മന്ത്രാലയം തുറന്നിട്ടുള്ള 0086 139 8999 0012, 0086 185 1428 4905 എന്നീ ഹെൽപ് ലൈൻ നമ്പറുകളിലും വിവരങ്ങൾ തേടാവുന്നതാണ്.