കാഠ്മണ്ഡു: നേപ്പാളിലുണ്ടായ മിന്നൽ പ്രളയത്തിൽ മരിച്ചവരുടെ എണ്ണം 600 കടന്നു. കാണാതായവരുടെ എണ്ണം 1924 ആയി ഉയർന്നതായി നേപ്പാൾ സർക്കാർ അറിയിച്ചു. നേരത്തെ ആയിരത്തോളം പേരെ കാണാതായെന്നായിരുന്നു സർക്കാർ കണക്ക്. ജലവൈദ്യുത പദ്ധതികളിൽ ജോലി ചെയ്തിരുന്ന 993 പേരും കാണാതായവരിലുണ്ട്.

ഏകദേശം 500 വിദേശ പൗരന്മാരെയും ഇതുവരെ കണ്ടെത്താനായിട്ടില്ല. കാണാതായവരിൽ 320 ഇന്ത്യക്കാരും വിദേശ പൗരത്വമുള്ള നൂറിലധികം ഇന്ത്യൻ വംശജരും ഉൾപ്പെടുന്നതായി വിദേശകാര്യ മന്ത്രാലയം അറിയിച്ചു. എട്ട് മലയാളികളെയും ഇതുവരെ കണ്ടെത്താനായിട്ടില്ല.

അതേസമയം, നേപ്പാളിലെ രക്ഷാപ്രവർത്തനങ്ങൾക്ക് ഇന്ത്യയുടെ സഹായം ശക്തമാക്കി. പ്രളയത്തിൽ തകർന്ന ത്രിശൂലി ജലവൈദ്യുത പദ്ധതിയിൽ ജോലി ചെയ്തിരുന്ന 63 പേരെ രക്ഷപ്പെടുത്താൻ കഴിഞ്ഞു. തുരങ്കങ്ങളിൽ കുടുങ്ങിയവർക്കായി തിരച്ചിൽ നടത്തുന്നതിന് പ്രത്യേക വൈദഗ്ധ്യമുള്ള സംഘത്തെയും ഇന്ത്യ നേപ്പാളിലേക്ക് അയച്ചിട്ടുണ്ട്.

നേപ്പാളിൽ ഇതുവരെ 84 ഇന്ത്യക്കാരെ കണ്ടെത്തിയതായി വിദേശകാര്യ മന്ത്രാലയം അറിയിച്ചു. രക്ഷപ്പെടുത്തിയ 21 ഇന്ത്യക്കാരെ നാട്ടിലെത്തിച്ചു. ആദ്യഘട്ടത്തിൽ തിരിച്ചെത്തിയവരിൽ തമിഴ്നാട്ടിൽ നിന്നുള്ളവരാണ് കൂടുതലെന്നും വിദേശകാര്യ വക്താവ് രൺധീർ ജയ്സ്വാൾ പറഞ്ഞു.

ടിബറ്റൻ മേഖലയിൽ കുടുങ്ങിയിരുന്ന 96 ഇന്ത്യക്കാർ സുരക്ഷിതമായി നേപ്പാൾ ഭാഗത്തേക്ക് കടന്നിട്ടുണ്ട്. ടിബറ്റ് ഭാഗത്ത് കഴിയുന്ന 400 ഇന്ത്യക്കാരും സുരക്ഷിതരാണെന്ന് വിദേശകാര്യ മന്ത്രാലയം വ്യക്തമാക്കി. ടിബറ്റിൽ നിന്ന് നേപ്പാളിലേക്ക് സുരക്ഷിതമായി എത്തിയ 149 പേരുടെ പട്ടികയും മന്ത്രാലയം പുറത്തുവിട്ടു. ഗുജറാത്ത്, ആന്ധ്രപ്രദേശ്, തെലങ്കാന തുടങ്ങിയ സംസ്ഥാനങ്ങളിൽ നിന്നുള്ളവരാണ് പട്ടികയിൽ കൂടുതലുള്ളത്.

പ്രളയത്തിൽ എത്ര ഇന്ത്യക്കാർ മരിച്ചുവെന്ന കാര്യത്തിൽ നിലവിൽ വ്യക്തമായ കണക്കില്ലെന്ന് രൺധീർ ജയ്സ്വാൾ പറഞ്ഞു. തുരങ്കങ്ങളിൽ കുടുങ്ങിക്കിടക്കുന്നവരെ കണ്ടെത്തുന്നതിനും രക്ഷാപ്രവർത്തനങ്ങൾ ഏകോപിപ്പിക്കുന്നതിനുമായി വിദഗ്ധ സംഘത്തെ ഇന്ത്യ അയച്ചിട്ടുണ്ടെന്നും അദ്ദേഹം വ്യക്തമാക്കി.

ദുരന്തത്തിന്റെ പശ്ചാത്തലത്തിൽ യൂറോപ്യൻ യൂണിയൻ ഉൾപ്പെടെ നിരവധി രാജ്യങ്ങൾ നേപ്പാളിന് അടിയന്തര ധനസഹായം പ്രഖ്യാപിച്ചിട്ടുണ്ട്. രക്ഷാപ്രവർത്തനങ്ങൾ തുടരുന്നതിനിടെ കാണാതായവർക്കായുള്ള തിരച്ചിൽ കൂടുതൽ ശക്തമാക്കിയിരിക്കുകയാണ്.