കൊച്ചി: നെടുമ്പാശ്ശേരിയിൽ മൂന്ന് പേർ മരിച്ച വാഹനാപകടക്കേസിൽ പ്രതി സുഹൈൽ സജീവിനെതിരെ നിർണായക തെളിവായി ശബ്ദരേഖ കോടതിയിൽ സമർപ്പിച്ച് പൊലീസ്. കേസിലെ മൂന്നാം പ്രതിയായ ജോയൽ അയച്ച ശബ്ദസന്ദേശമാണ് തെളിവായി ഹാജരാക്കിയത്. പ്രതികളുടെ ജാമ്യാപേക്ഷയെ എതിർത്തുകൊണ്ടാണ് അന്വേഷണസംഘം കോടതിയിൽ ഈ തെളിവ് സമർപ്പിച്ചത്.
അപകടസമയത്ത് സുഹൈൽ ഓടിച്ച മിനി കൂപ്പർ കാറിൽ ജോയലും ഉണ്ടായിരുന്നുവെന്നാണ് പൊലീസ് പറയുന്നത്. സുഹൈൽ മദ്യപിച്ച് അമിതവേഗത്തിൽ വാഹനം ഓടിച്ചെന്നും യാത്രയ്ക്കിടെ സ്കൂട്ടറിൽ ഇടിച്ചെന്നും ശബ്ദസന്ദേശത്തിൽ പറയുന്നുണ്ട്. അപകടത്തിൽ മൂന്ന് പേർ മരിച്ചതോടെ ഭയന്നുപോയ തങ്ങൾ സ്ഥലത്തുനിന്ന് രക്ഷപ്പെട്ടുവെന്നും സന്ദേശത്തിലുണ്ട്. നാട്ടുകാർ എത്തിയപ്പോൾ സുഹൈൽ, പിതാവ് ഇടപെട്ട് കാര്യങ്ങൾ കൈകാര്യം ചെയ്യുമെന്ന തരത്തിൽ പ്രതികരിച്ചതായും ശബ്ദരേഖയിലുണ്ടെന്നാണ് പൊലീസ് കോടതിയെ അറിയിച്ചത്.
പ്രതികൾ സ്ഥിരമായി അമിതവേഗത്തിൽ വാഹനമോടിക്കുന്നതിന്റെ തെളിവുകൾ ലഭിച്ചിട്ടുണ്ടെന്നും അപകടത്തിൽ മൂന്ന് പേർ മരിച്ച വിവരം സുഹൃത്തിനെ അറിയിച്ചിട്ടുണ്ടെന്നും പൊലീസ് വ്യക്തമാക്കി. അപകടത്തിനു പിന്നാലെ സുഹൈൽ ആദ്യം ഫോണിൽ ബന്ധപ്പെട്ടത് പിതാവിനെയാണെന്ന വിവരവും അന്വേഷണസംഘം കോടതിയിൽ ഉന്നയിച്ചു. പ്രതികൾക്ക് ജാമ്യം അനുവദിക്കുന്നത് സമൂഹത്തിന് തെറ്റായ സന്ദേശം നൽകുമെന്നും പൊലീസ് വാദിച്ചു.
എന്നാൽ, എഫ്.ഐ.ആറിൽ പ്രതികളുടെ പേരുകൾ പരാമർശിച്ചിട്ടില്ലെന്നും മതിയായ തെളിവുകളില്ലാതെയാണ് നരഹത്യാക്കുറ്റം ചുമത്തിയതെന്നുമാണ് പ്രതിഭാഗത്തിന്റെ വാദം. കേസിന്റെ അന്തിമഫലം നേരത്തേ തീരുമാനിച്ചശേഷമാണ് നടപടികൾ മുന്നോട്ടുകൊണ്ടുപോകുന്നതെന്നും പ്രതികൾക്കുവേണ്ടി ഹാജരായ അഭിഭാഷകർ ആരോപിച്ചു.
നേരത്തേ അങ്കമാലി മജിസ്ട്രേറ്റ് കോടതി പ്രതികളുടെ ജാമ്യാപേക്ഷ തള്ളിയിരുന്നു. ഇതേത്തുടർന്നാണ് പ്രതികൾ സെഷൻസ് കോടതിയെ സമീപിച്ചത്. ജാമ്യാപേക്ഷയിൽ കോടതിയിലെ വാദം തുടരുകയാണ്.
