കോൺഗ്രസ് എംഎൽഎമാർ കൂറുമാറി; രാജ്യസഭാ തെരഞ്ഞെടുപ്പിൽ എൻഡിഎക്ക് അട്ടിമറി ജയം
ന്യൂഡൽഹി: രാജ്യസഭാ തിരഞ്ഞെടുപ്പിൽ വിവിധ സംസ്ഥാനങ്ങളിൽ ദേശീയ ജനാധിപത്യ സഖ്യത്തിന് അപ്രതീക്ഷിത മുന്നേറ്റം. ബിഹാറിലും ഒഡീഷയിലും എൻഡിഎ സ്ഥാനാർത്ഥികൾ അട്ടിമറി വിജയം നേടി. ബിഹാറിൽ നടന്ന തിരഞ്ഞെടുപ്പിൽ അഞ്ചു സീറ്റുകളും ദേശീയ ജനാധിപത്യ സഖ്യ സ്ഥാനാർത്ഥികൾ സ്വന്തമാക്കി. ഭാരതീയ ജനതാ പാർട്ടി ദേശീയ അധ്യക്ഷനായ നിതിൻ നവീൻ, മുൻ മുഖ്യമന്ത്രിയും ജനതാദൾ (യുണൈറ്റഡ്) നേതാവുമായ നിതീഷ് കുമാർ എന്നിവരാണ് വിജയിച്ച പ്രമുഖർ. കോൺഗ്രസിന്റെ മൂന്ന് നിയമസഭാംഗങ്ങൾ കൂറുമാറി വോട്ട് ചെയ്തതാണ് ഈ വിജയം സാധ്യമാക്കിയതെന്നാണ് റിപ്പോർട്ടുകൾ. എന്നാൽ തിരഞ്ഞെടുപ്പിൽ ഭാരതീയ ജനതാ പാർട്ടി വ്യാപകമായ ക്രമക്കേടുകൾ നടത്തിയതായി ആരോപിച്ച് രാഷ്ട്രിയ ജനതാദൾ നേതാവ് തേജസ്വി യാദവ് രംഗത്തെത്തി.
ഒഡീഷയിലും ദേശീയ ജനാധിപത്യ സഖ്യം ശക്തമായ വിജയം നേടി. നാല് സീറ്റുകളിൽ മൂന്നിലും സഖ്യ സ്ഥാനാർത്ഥികൾ വിജയിച്ചു. കോൺഗ്രസ് – ബിജു ജനതാദൾ സംയുക്ത സ്ഥാനാർത്ഥി പരാജയപ്പെട്ടത് രാഷ്ട്രീയ നിരീക്ഷകരെ അതിശയിപ്പിച്ചു. ഒഡീഷയിലും കൂറുമാറ്റം നടന്നതായുള്ള ആരോപണങ്ങൾ ഉയരുന്നുണ്ട്.
അതേസമയം ഹരിയാനയിൽ വോട്ടെണ്ണൽ സംബന്ധിച്ച തർക്കം തുടരുന്നതിനാൽ ഫലം പ്രഖ്യാപനം വൈകുകയാണ്. രണ്ട് കോൺഗ്രസ് നിയമസഭാംഗങ്ങളുടെ വോട്ടുകൾ അസാധുവാക്കാൻ ശ്രമമുണ്ടെന്നാണ് കോൺഗ്രസ് ആരോപണം. വിഷയത്തിൽ അഖിലേന്ത്യ കോൺഗ്രസ് കമ്മിറ്റി അധ്യക്ഷനായ മല്ലികാർജ്ജുൻ ഖാർഗെ കേന്ദ്ര തിരഞ്ഞെടുപ്പ് കമ്മീഷനിൽ പരാതി നൽകിയിട്ടുണ്ട്.
