കേരള നിയമസഭയിലെ എൻസിപി അംഗങ്ങളായ മന്ത്രി എ കെ ശശീന്ദ്രനും തോമസ് കെ തോമസും നിയമസഭാംഗത്വം രാജിവെക്കണമെന്നാവശ്യപ്പെട്ട് എൻസിപി ദേശീയ വർക്കിങ് പ്രസിഡന്റ് പ്രഫുൽ പട്ടേൽ. ഇക്കാര്യം ചൂണ്ടിക്കാട്ടി രണ്ടുപേർക്കും പ്രഫുൽ പട്ടേൽ കത്തയച്ചു. ഒരാഴ്ച്ചയ്ക്കകം രാജിവെക്കണമെന്നും ഇല്ലെങ്കിൽ അയോഗ്യരാക്കാനുള്ള നടപടികൾ സ്വീകരിക്കുമെന്നുമാണ് കത്തിൽ വ്യക്തമാക്കുന്നത്. ഇരുവരെയും ആറുവർഷത്തേക്ക് പാർട്ടിയിൽ നിന്നും സസ്പെൻഡ് ചെയ്തിട്ടുണ്ടെന്നും പ്രഫുൽ പട്ടേൽ വ്യക്തമാക്കി.
എൻസിപി പിളർന്ന് ശരദ്പവാർ, അജിത് പവാർ വിഭാഗങ്ങളായി മാറിയതോടെയാണ് കേരളത്തിലെ എൻസിപിയിലും പ്രശ്നമായത്. ഔദ്യോഗിക വിഭാഗമായി തിരഞ്ഞെടുപ്പ് കമ്മിഷൻ അംഗീകരിച്ചിരിക്കുന്നത് അജിത് പവാർ വിഭാഗത്തെയാണ്. ക്ലോക്ക് ചിഹ്നം നൽകിയതും ഈ വിഭാഗത്തിനാണ്. എൻസിപിയുടെ ക്ലോക്ക് ചിഹ്നത്തിൽ മത്സരിച്ചാണ് 2021ൽ എകെ ശശീന്ദ്രനും തോമസ് കെ തോമസും എംഎൽഎമാരായതെന്ന ആയതെന്ന കാര്യം കത്തിൽ ചൂണ്ടിക്കാട്ടുന്നു.
നേരത്തേ, മേയ് 31നകം രാജി വയ്ക്കണമെന്ന് പ്രഫുൽ പട്ടേൽ ആവശ്യപ്പെട്ടെങ്കിലും രണ്ടുപേരും രാജിവച്ചില്ല. രണ്ടുപേരും ശരദ്പവാറിന്റെ കൂടെയാണെന്ന് തോമസ് കെ.തോമസ് മാധ്യമങ്ങളോട് പറഞ്ഞു. കേരള സ്പീക്കറാണ് അയോഗ്യതയുടെ കാര്യത്തിൽ തീരുമാനമെടുക്കുന്നതെന്നും അദ്ദേഹം പറഞ്ഞു.
