കൊച്ചി: കേരള സര്‍ക്കാര്‍ പൊതുവിദ്യാഭ്യാസ വകുപ്പിന്റെ സാങ്കേതിക വിഭാഗമായ കേരള ഇന്‍ഫ്രാസ്ട്രക്ചര്‍ ആന്‍ഡ് ടെക്‌നോളജി ഫോര്‍ എഡ്യൂക്കേഷന്‍ (കൈറ്റ്) നാവിക വിദ്യാഭ്യാസ സൊസൈറ്റിയുടെ കീഴിലുള്ള സിബിഎസ്ഇ സ്ഥാപനമായ കൊച്ചിയിലെ നേവി ചില്‍ഡ്രന്‍ സ്‌കൂളുമായി (എന്‍ സി എസ്) പങ്കാളിത്തത്തം പ്രഖ്യാപിച്ചു. ഡിജിറ്റല്‍ വിദ്യാഭ്യാസത്തില്‍ ഗണ്യമായ പുരോഗതി കൈവരിക്കുന്നതിന് ദക്ഷിണ നാവിക കമാന്‍ഡിലെ എന്‍സിഎസ് കൊച്ചി വൈസ് ചെയര്‍പേഴ്സണ്‍ കൊമോഡോര്‍ ബെന്‍ എച്ച് ബെര്‍സണും കൈറ്റ് സിഇഒ കെ അന്‍വര്‍ സാദത്തും ധാരണാപത്രത്തില്‍ ഒപ്പുവച്ചു.
സഹകരണത്തിലൂടെ പ്രധാന വിദ്യാഭ്യാസ മേഖലകളില്‍ കൈറ്റ് സമഗ്രമായ പിന്തുണ നല്‍കും. വിദ്യാര്‍ഥികള്‍ക്ക് ആകര്‍ഷകവും പ്രായോഗികവുമായ സ്റ്റെം പഠനാന്തരീക്ഷം വളര്‍ത്തിയെടുക്കുന്നതിന് സൗജന്യവും ഓപ്പണ്‍ സോഴ്സ് സോഫ്റ്റ്വെയര്‍ (ഫോസ്) ഉപകരണങ്ങള്‍ പൂര്‍ണ്ണമായും സജ്ജീകരിച്ചിരിക്കുന്ന അത്യാധുനിക എഐ, റോബോട്ടിക്‌സ് ലബോറട്ടറികള്‍ സ്ഥാപിക്കുന്നത് ഇതില്‍ ഉള്‍പ്പെടുന്നു. കൂടാതെ, ഡിജിറ്റല്‍ അധ്യാപനശാസ്ത്രം, ഐസിടി സംയോജനം, നൂതന ക്ലാസ് റൂം രീതികള്‍ എന്നിവയില്‍ അധ്യാപകരുടെ പ്രാവീണ്യം വര്‍ധിപ്പിക്കുക എന്ന ലക്ഷ്യത്തോടെ ഘടനാപരമായ പരിശീലന പരിപാടികള്‍ നടത്തി അധ്യാപകരുടെ ശേഷി വര്‍ധിപ്പിക്കുന്നതിനുള്ള സംരംഭങ്ങള്‍ക്ക് കൈറ്റ് നേതൃത്വം നല്‍കും. മൊത്തത്തിലുള്ള അധ്യാപന- പഠന അനുഭവം സമ്പന്നമാക്കുന്നതിന് സ്മാര്‍ട്ട് ക്ലാസ് റൂം സാങ്കേതികവിദ്യകളുടെ ഫലപ്രദമായ ഉപയോഗവും ഈ സംരംഭം പ്രോത്സാഹിപ്പിക്കും.
കോഡിംഗ്, റോബോട്ടിക്‌സ്, ആര്‍ട്ടിഫിഷ്യല്‍ ഇന്റലിജന്‍സ് എന്നിവയിലെ പ്രായോഗിക പദ്ധതികളിലൂടെ വിദ്യാര്‍ഥികള്‍ നയിക്കുന്ന നവീകരണം വളര്‍ത്തിയെടുക്കുന്നതിന് എന്‍ സി എസ് കൊച്ചിയില്‍ ലിറ്റില്‍ കൈറ്റ്‌സ് ഐടി ക്ലബ് പ്രോഗ്രാം അവതരിപ്പിക്കും. കൂടാതെ, കൈറ്റ് വിക്ടേഴ്‌സ് വിദ്യാഭ്യാസ ചാനല്‍ പ്ലാറ്റ്ഫോം ഉള്‍പ്പെടെയുള്ള വിശാലമായ ഡിജിറ്റല്‍ ഉറവിടങ്ങളും ഉപയോഗിക്കാനാവും. വിദ്യാര്‍ഥികള്‍ക്ക് ഉള്ളടക്കങ്ങള്‍ സൃഷ്ടിക്കാനും പ്രൊജക്ടുകള്‍ വിക്ടേഴ്‌സിലൂടെ പ്രേക്ഷകരിലേക്ക് പ്രദര്‍ശിപ്പിക്കാനും സാധിക്കും.
'ഡിജിറ്റല്‍ വിദ്യാഭ്യാസത്തെ ജനാധിപത്യവല്‍ക്കരിക്കുന്നതിനുള്ള പ്രതിബദ്ധത ഈ ദേശീയ തലത്തിലുള്ള സംരംഭം പ്രതിഫലിപ്പിക്കുന്നു'വെന്ന് കെ അന്‍വര്‍ സാദത്ത് പറഞ്ഞു. സാങ്കേതികവിദ്യ മാത്രമല്ല നല്‍കുന്നതെന്നും അടിസ്ഥാന സൗകര്യങ്ങള്‍, പരിശീലനം, നവീകരണ പ്ലാറ്റ്ഫോമുകള്‍ എന്നിവയുടെ പിന്തുണയോടെ നാവികസേനയിലെ സ്‌കൂള്‍ കുട്ടികള്‍ക്ക് ഡിജിറ്റല്‍ യുഗത്തില്‍ അഭിവൃദ്ധി പ്രാപിക്കാന്‍ കഴിയുന്ന ആവാസവ്യവസ്ഥ കെട്ടിപ്പടുക്കുകയാണെന്നും അദ്ദേഹം പറഞ്ഞു.
കൈറ്റ്, നേവി എഡ്യൂക്കേഷന്‍ സൊസൈറ്റി, അക്കാദമിക് ലീഡര്‍മാര്‍, എന്‍സിഎസ് കൊച്ചിയിലെ ഫാക്കല്‍റ്റി അംഗങ്ങള്‍, വിദ്യാര്‍ഥി പ്രതിനിധികള്‍ എന്നിവര്‍ ഒപ്പുവയ്ക്കല്‍ ചടങ്ങില്‍ പങ്കെടുത്തു.
