ഓസ്‌ലോ: 2026ലെ സമാധാന നൊബേൽ പുരസ്കാരം ഇന്ത്യൻ വംശജയും ദക്ഷിണാഫ്രിക്കൻ നിയമജ്ഞയുമായ നവനീതം പിള്ളയ്ക്ക്. മനുഷ്യാവകാശ സംരക്ഷണത്തിനും വംശീയ, ലിംഗ, വർണ വിവേചനങ്ങൾക്കെതിരായ പോരാട്ടത്തിനും രാജ്യാന്തര തലത്തിൽ ശ്രദ്ധേയമായ സംഭാവനകൾ നൽകിയ വ്യക്തിയാണ് നവനീതം പിള്ള. 2008 മുതൽ 2014 വരെ ഐക്യരാഷ്ട്ര സംഘടനയുടെ മനുഷ്യാവകാശ ഹൈക്കമ്മിഷണറായി പ്രവർത്തിച്ച അവർ നിയമരംഗത്തും മനുഷ്യാവകാശ പ്രവർത്തനങ്ങളിലും വ്യക്തിമുദ്ര പതിപ്പിച്ചിട്ടുണ്ട്.

1941 സെപ്റ്റംബർ 23ന് ദക്ഷിണാഫ്രിക്കയിലെ ഡർബനിലുള്ള ക്ലെയർവുഡിലാണ് നവനീതം പിള്ള ജനിച്ചത്. തമിഴ് വംശജരായ ഇന്ത്യൻ കുടുംബത്തിൽ ജനിച്ച അവർക്ക് ബാല്യകാലം മുതൽ സാമൂഹികവും സാമ്പത്തികവുമായ നിരവധി വെല്ലുവിളികൾ നേരിടേണ്ടിവന്നു. കരാർ തൊഴിലാളിയായി തമിഴ്നാട്ടിൽനിന്ന് ദക്ഷിണാഫ്രിക്കയിലെത്തിയ മുത്തശ്ശന്റെ പാരമ്പര്യമുള്ള കുടുംബമായിരുന്നു അവരുടേത്. ബസ് ഡ്രൈവറായിരുന്ന പിതാവും വീട്ടമ്മയായിരുന്ന മാതാവും എട്ടു മക്കളെ വളർത്തുന്നതിനിടയിലും വിദ്യാഭ്യാസത്തിന് വലിയ പ്രാധാന്യം നൽകി.

വർണവിവേചനം ശക്തമായി നിലനിന്നിരുന്ന ദക്ഷിണാഫ്രിക്കയിൽ കറുത്തവർഗക്കാരും ഇന്ത്യൻ വംശജരും നേരിട്ടിരുന്ന വിവേചനങ്ങളും പ്രതിബന്ധങ്ങളും നവനീതം പിള്ളയുടെ ജീവിതത്തെയും സ്വാധീനിച്ചു. എന്നാൽ പ്രതിസന്ധികളെ അതിജീവിച്ച് ഉന്നത വിദ്യാഭ്യാസം നേടിയ അവർ പിന്നീട് വിവേചനത്തിനെതിരായ പോരാട്ടത്തിന്റെ മുൻനിരയിലെത്തി.

നാറ്റൽ സർവകലാശാലയിൽനിന്ന് ബിരുദവും നിയമബിരുദവും നേടിയ നവനീതം പിള്ള, അമേരിക്കയിലെ ഹാർവഡ് ലോ സ്കൂളിൽനിന്ന് എൽഎൽഎം ബിരുദവും സ്വന്തമാക്കി. 1988ൽ നിയമത്തിൽ ഡോക്ടറേറ്റും നേടി. ഹാർവഡിൽനിന്ന് നിയമത്തിൽ ഡോക്ടറേറ്റ് നേടിയ ആദ്യ ദക്ഷിണാഫ്രിക്കക്കാരിയെന്ന നേട്ടവും അവർക്കുണ്ട്.

1967ൽ നാറ്റൽ പ്രവിശ്യയിൽ സ്വന്തമായി നിയമസ്ഥാപനം ആരംഭിച്ച ആദ്യ വനിതയായി അവർ ചരിത്രം കുറിച്ചു. വർണവിവേചനത്തിനെതിരെ പോരാടിയ സാമൂഹിക പ്രവർത്തകർക്കും രാഷ്ട്രീയത്തടവുകാർക്കും നിയമസഹായം നൽകുന്നതിൽ അവർ സജീവമായിരുന്നു. തടവുകാരുടെ അവകാശങ്ങൾ സംരക്ഷിക്കുന്നതിനും കസ്റ്റഡിയിലെ പീഡനങ്ങൾക്കെതിരെ ശബ്ദമുയർത്തുന്നതിനും അവർ മുന്നിട്ടിറങ്ങി.

1995ൽ ദക്ഷിണാഫ്രിക്കൻ ഹൈക്കോടതിയിൽ ആക്ടിങ് ജഡ്ജിയായി നിയമിതയായ ആദ്യ കറുത്തവർഗക്കാരിയെന്ന നേട്ടവും നവനീതം പിള്ള സ്വന്തമാക്കി. അതേ വർഷം റുവാണ്ടയ്ക്കായുള്ള ഐക്യരാഷ്ട്ര സംഘടനയുടെ രാജ്യാന്തര ക്രിമിനൽ ട്രൈബ്യൂണലിൽ ജഡ്ജിയായി നിയമിക്കപ്പെട്ടു. 1999 മുതൽ 2003 വരെ ട്രൈബ്യൂണലിന്റെ അധ്യക്ഷയായി സേവനമനുഷ്ഠിച്ചു. 2003ൽ രാജ്യാന്തര ക്രിമിനൽ കോടതിയിലും ജഡ്ജിയായി.

2008 സെപ്റ്റംബർ ഒന്നിനാണ് നവനീതം പിള്ള ഐക്യരാഷ്ട്ര സംഘടനയുടെ മനുഷ്യാവകാശ ഹൈക്കമ്മിഷണറായി ചുമതലയേറ്റത്. 2014 വരെ ആ സ്ഥാനത്ത് തുടർന്ന അവർ ലോകത്തിന്റെ വിവിധ ഭാഗങ്ങളിലെ മനുഷ്യാവകാശ പ്രശ്നങ്ങൾ ഉയർത്തിക്കാട്ടുന്നതിലും വിവേചനങ്ങൾക്കെതിരെ നിലപാടെടുക്കുന്നതിലും നിർണായക പങ്കുവഹിച്ചു.

സ്ത്രീകളുടെ അവകാശങ്ങൾക്കായി പ്രവർത്തിക്കുന്ന രാജ്യാന്തര സംഘടനയായ ഇക്വാലിറ്റി നൗവിന്റെ സഹസ്ഥാപക കൂടിയാണ് നവനീതം പിള്ള. നിയമം, നീതി, മനുഷ്യാവകാശം എന്നീ മേഖലകളിലെ ദീർഘകാല പ്രവർത്തനങ്ങളിലൂടെ രാജ്യാന്തര ശ്രദ്ധ നേടിയ അവരുടെ ജീവിതയാത്ര വിവേചനങ്ങൾക്കെതിരായ പോരാട്ടത്തിന്റെ ശ്രദ്ധേയമായ അധ്യായമാണ്.