ദോഹ: 2026-ലെ ഖത്തർ ദേശീയ കായിക ദിനത്തോടനുബന്ധിച്ച് ഫെബ്രുവരി 10 ചൊവ്വാഴ്ച രാജ്യത്ത് പൊതു അവധി പ്രഖ്യാപിച്ചു. അമിരി ദിവാനാണ് ഇത് സംബന്ധിച്ച ഔദ്യോഗിക വിജ്ഞാപനം പുറപ്പെടുവിച്ചത്. എല്ലാ വർഷവും ഫെബ്രുവരിയിലെ രണ്ടാം ചൊവ്വാഴ്ചയാണ് ഖത്തർ ദേശീയ കായിക ദിനമായി ആചരിക്കുന്നത്.
ആരോഗ്യകരമായ ജീവിതശൈലി പ്രോത്സാഹിപ്പിക്കുക, കായിക വിനോദങ്ങളിൽ പൊതുജന പങ്കാളിത്തം ഉറപ്പാക്കുക എന്നീ ലക്ഷ്യങ്ങളോടെയാണ് ഈ ദിവസം ആഘോഷിക്കുന്നത്. അവധി പ്രമാണിച്ച് രാജ്യത്തെ സർക്കാർ-സ്വകാര്യ സ്ഥാപനങ്ങളും വിദ്യാഭ്യാസ സ്ഥാപനങ്ങളും പ്രവർത്തിക്കില്ല.
ദേശീയ കായിക ദിനത്തിന്റെ ഭാഗമായി രാജ്യത്തുടനീളം വിപുലമായ പരിപാടികളാണ് ആസൂത്രണം ചെയ്തിരിക്കുന്നത്. ആസ്പയർ സോൺ, എജ്യൂക്കേഷൻ സിറ്റി, ലുസൈൽ ബൊളിവാർഡ്, കോർണിഷ് എന്നിവിടങ്ങളിൽ കായിക മത്സരങ്ങളും വ്യായാമ പരിപാടികളും നടക്കും. സ്പോർട്സ് ഡേയോടനുബന്ധിച്ച് പൊതുജനങ്ങൾക്കായി വിവിധ കായിക ഫെഡറേഷനുകളും മന്ത്രാലയങ്ങളും, പ്രവാസി സംഘടനകളും പ്രത്യേക പരിപാടികൾ സംഘടിപ്പിക്കുന്നുണ്ട്.
