ദോഹ: ഖത്തറിലെ ദേശീയ വ്യവസായ മേഖലയെ ശാക്തീകരിക്കുന്നതിന്റെ ഭാഗമായി വാണിജ്യ വ്യവസായ മന്ത്രി ഷെയ്ഖ് ഫൈസൽ ബിൻ താനി അൽ താനി വിവിധ ഫാക്ടറികളിൽ സന്ദർശനം നടത്തി. ചെറുകിട-ഇടത്തരം വ്യവസായ മേഖലയിൽ (SME Area) പ്രവർത്തിക്കുന്ന നിർമ്മാണ സാമഗ്രികൾ, ലോഹ വ്യവസായം എന്നീ വിഭാഗങ്ങളിലെ ഫാക്ടറികളിലാണ് മന്ത്രി നേരിട്ടെത്തിയത്.
സന്ദർശന വേളയിൽ ഉൽപ്പാദന പ്രക്രിയകളും പ്രവർത്തന ശേഷിയും മന്ത്രി വിലയിരുത്തി. ഫാക്ടറി ഉടമകളുമായും നിർമ്മാതാക്കളുമായും നടത്തിയ ചർച്ചയിൽ വ്യവസായ വികസനത്തിന്റെ അടുത്ത ഘട്ടത്തിലെ ആവശ്യകതകൾ, പ്രവർത്തനക്ഷമത വർദ്ധിപ്പിക്കൽ, നേരിടുന്ന വെല്ലുവിളികൾ എന്നിവ പ്രധാന വിഷയങ്ങളായി. പ്രാദേശിക ഉൽപ്പാദനം ശക്തിപ്പെടുത്തുന്നതിനുള്ളഅവസരങ്ങളെക്കുറിച്ചും അദ്ദേഹം സംസാരിച്ചു.
ഖത്തർ നാഷണൽ വിഷൻ 2030-ന്റെ ലക്ഷ്യങ്ങൾക്കനുസൃതമായി രാജ്യത്തിന്റെ സാമ്പത്തിക അടിത്തറ വൈവിധ്യവൽക്കരിക്കാനും ചെറുകിട-ഇടത്തരം സംരംഭങ്ങളുടെ വളർച്ച പ്രോത്സാഹിപ്പിക്കാനും മന്ത്രാലയം പ്രതിജ്ഞാബദ്ധമാണെന്ന് ഈ സന്ദർശനം അടിവരയിടുന്നു.
