ദോഹ : ഖത്തറിലെ മുൻനിര ആരോഗ്യ സേവന ദാതാക്കളായ നസീം ഹെൽത്ത്‌കെയർ, അൽഖോർ ശാഖയിൽ വിപുലമായ ചികിത്സാ സൗകര്യങ്ങൾ ഒരുക്കി കുടുംബാരോഗ്യ രംഗത്ത് പുതിയ മാതൃക തീർക്കുന്നു. വെള്ളിയാഴ്ച ഉൾപ്പെടെ ആഴ്ചയിൽ ഏഴു ദിവസവും തടസ്സമില്ലാത്ത വിദഗ്ധ ചികിത്സ ഉറപ്പാക്കുന്ന "ഓൾ ഡേ, എവരി ഡേ" (All Day, Every Day) എന്ന പുതിയ പ്രവർത്തന ശൈലി സെന്റർ ഔദ്യോഗികമായി പ്രഖ്യാപിച്ചു.
​അൽഖോർ, അൽ തഖീറ, സുമൈസ്മ, റാസ് ലഫാൻ, അൽ ബൈത്ത് സ്റ്റേഡിയം പരിസരം എന്നിവിടങ്ങളിലെ താമസക്കാർക്ക് ഏറ്റവും മികച്ച ചികിത്സാ സൗകര്യങ്ങൾ ഇനി വീടിനടുത്ത് തന്നെ ലഭ്യമാകും. അൽഖോർ-അൽ തഖീറ മുനിസിപ്പാലിറ്റി ജനറൽ മാനേജർ അബ്ദുല്ല ഇബ്രാഹിം അൽ സാദയ്ക്ക് വേണ്ടി മുനിസിപ്പൽ കൺട്രോൾ ഡിപ്പാർട്ട്മെന്റ് ഡയറക്ടർ അബ്ദുൽ അസീസ് അഹമ്മദ് അൽ സയ്യിദ്, അൽഖോർ സ്പോർട്സ് ക്ലബ് ജനറൽ മാനേജറും മുനിസിപ്പൽ കൗൺസിൽ അംഗവുമായ ഡോ. അബ്ദുള്ള മുഖല്ലദ് അൽ മർറിഖി എന്നിവർ ചേർന്ന് പുതിയ സേവനങ്ങളുടെ പ്രഖ്യാപനം നടത്തി.സൂപ്പർ സ്പെഷ്യാലിറ്റി വിഭാഗങ്ങൾ മുതൽ അത്യാധുനിക സൗന്ദര്യ വർദ്ധക ചികിത്സകൾ (Aesthetics) വരെ ഒരൊറ്റ കുടക്കീഴിൽ ലഭ്യമാണ് എന്നതാണ് ഈ വിപുലീകരണത്തിന്റെ പ്രത്യേകത.പീഡിയാട്രിക്സ്, ഗൈനക്കോളജി, ഓർത്തോപീഡിക്സ്, ഡെർമറ്റോളജി, ഇന്റേണൽ മെഡിസിൻ, ഡെന്റൽ, ഇ.എൻ.ടി, ഗ്യാസ്ട്രോ എൻട്രോളജി, കാർഡിയോളജി, പൾമണോളജി, ഒഫ്താൽമോളജി, ഫിസിയോതെറാപ്പി തുടങ്ങിയ ഒട്ടേറെ വിഭാഗങ്ങൾ ഇവിടെ പ്രവർത്തിക്കുന്നു.ചർമ്മ സംരക്ഷണം, ലേസർ ചികിത്സകൾ, ആന്റി ഏജിംഗ് സൊല്യൂഷനുകൾ എന്നിവയ്ക്കായി വിപുലമായ ഈസ്തെറ്റിക് വിഭാഗവും ഒരുക്കിയിട്ടുണ്ട്.ഭാഷാപരമായ തടസ്സങ്ങളില്ലാതെ മികച്ച ആശയവിനിമയം ഉറപ്പാക്കാൻ അറബ്, ഏഷ്യൻ വംശജരായ കൂടുതൽ ഡോക്ടർമാരെ വിവിധ വിഭാഗങ്ങളിൽ ഉൾപ്പെടുത്തിയിട്ടുണ്ട്. ഇത് ഖത്തറിലെ വൈവിധ്യമാർന്ന ജനവിഭാഗങ്ങൾക്ക് കൂടുതൽ ആത്മവിശ്വാസത്തോടെ ചികിത്സ തേടാൻ സഹായകമാകും.
​"ആരോഗ്യ സംരക്ഷണം സമയക്രമങ്ങൾ നോക്കിയല്ല വരുന്നത്. കുടുംബങ്ങൾ ഇന്ന് ആഗ്രഹിക്കുന്നത് തടസ്സമില്ലാത്തതും ആശ്രയിക്കാവുന്നതുമായ ചികിത്സാ സൗകര്യങ്ങളാണ്. വെള്ളിയാഴ്ച ഉൾപ്പെടെ എല്ലാ ദിവസവും എല്ലാ സ്പെഷ്യാലിറ്റി വിഭാഗങ്ങളും ലഭ്യമാക്കുന്നതിലൂടെ അൽഖോർ സമൂഹത്തിന് ഒരു സമ്പൂർണ്ണ ആരോഗ്യ കേന്ദ്രമായി നസീം മാറുകയാണ്," എന്ന് നസീം ഹെൽത്ത്‌കെയർ എം.ഡി മുഹമ്മദ് മിയാൻദാദ് വി.പി പറഞ്ഞു.
​നസീം ഹെൽത്ത്‌കെയർ ഓപ്പറേഷൻസ് ആന്റ് എച്ച്.ആർ ജനറൽ മാനേജർ ബാബു ഷാനവാസ്, കോർപ്പറേറ്റ് റിലേഷൻസ് ജനറൽ മാനേജർ ഡോ. മുനീർ അലി ഇബ്രാഹിം എന്നിവർ ചടങ്ങിൽ സംബന്ധിച്ചു. കുറഞ്ഞ കാത്തിരിപ്പ് സമയവും ഉയർന്ന നിലവാരമുള്ള ചികിത്സയും ഉറപ്പുനൽകിക്കൊണ്ട് വടക്കൻ ഖത്തറിലെ ഏറ്റവും പ്രിയപ്പെട്ട ആരോഗ്യ കേന്ദ്രമാകാൻ ഒരുങ്ങുകയാണ് നസീം മെഡിക്കൽ സെന്റർ അൽഖോർ.