ദോഹ: മലയാള ഗസല്‍ സംഗീതത്തിന് സ്വന്തം ശബ്ദത്തിലൂടെ പുതിയൊരു മുഖം നല്‍കിയ അനശ്വര ഗായകന്‍ ഉമ്പായിയുടെ ഓര്‍മദിനത്തില്‍ ദോഹയില്‍ വികാരനിര്‍ഭരമായ സംഗീതസായാഹ്നം അരങ്ങേറി. സംഗീതാസ്വാദകരും സാമൂഹിക-സാംസ്‌കാരിക രംഗത്തെ പ്രമുഖരും പങ്കെടുത്ത പരിപാടിയില്‍ ഉമ്പായിയുടെ ശിഷ്യനും ശ്രദ്ധേയ ഗായകനുമായ മുത്വലിബ് മട്ടന്നൂര്‍ ഗുരുവിന് സംഗീതാര്‍ച്ചന അര്‍പ്പിച്ചു.
2018 ആഗസ്റ്റ് 1-ന് വിടപറഞ്ഞ ഉമ്പായി, ഭാവസാന്ദ്രവും സ്വാഭാവികവുമായ ആലാപനത്തിലൂടെ മലയാള ഗസലിനെ ജനഹൃദയങ്ങളിലേക്ക് എത്തിച്ച അപൂര്‍വ ഗായകനായിരുന്നുവെന്ന് അനുസ്മരണ പ്രഭാഷകര്‍ അഭിപ്രായപ്പെട്ടു. അദ്ദേഹത്തിന്റെ ഗാനങ്ങള്‍ ഇന്നും സംഗീതപ്രേമികളുടെ ഹൃദയങ്ങളില്‍ ജീവിച്ചിരിക്കുന്നുവെന്നും അവര്‍ പറഞ്ഞു.
പരിപാടിയില്‍ സംസാരിച്ച മുത്വലിബ് മട്ടന്നൂര്‍, ഉമ്പായിയുമായുള്ള ആത്മബന്ധം അനുസ്മരിച്ചു. തന്റെ ജീവിതകാലത്ത് ഉമ്പായി ഉപയോഗിച്ചിരുന്ന ഹാര്‍മോണിയം സ്വന്തം കൈകൊണ്ട് സമ്മാനിക്കുകയും അനുഗ്രഹിക്കുകയും ചെയ്ത അനുഭവം ജീവിതത്തിലെ ഏറ്റവും വലിയ ഭാഗ്യമായി അദ്ദേഹം വിശേഷിപ്പിച്ചു.
'ആ ഹാര്‍മോണിയം എനിക്ക് ഒരു സംഗീതോപകരണം മാത്രമല്ല; ഗുരുവിന്റെ അനുഗ്രഹത്തിന്റെയും സ്‌നേഹത്തിന്റെയും പ്രതീകമാണ്. ഓരോ തവണയും അതില്‍ സംഗീതം പകരുമ്പോള്‍ ഉമ്പായി സാറിന്റെ സാന്നിധ്യം അനുഭവപ്പെടാറുണ്ട്,' അദ്ദേഹം പറഞ്ഞു.
തുടര്‍ന്ന് മുത്വലിബ് ഉമ്പായിയുടെ അനശ്വര ഗാനങ്ങള്‍ ആലപിച്ച് സദസിനെ വികാരഭരിതമാക്കി. ഓരോ ഗാനവും ഉമ്പായിയുടെ ശൈലിയുടെയും ആത്മാവിന്റെയും ഓര്‍മകള്‍ പ്രേക്ഷകരിലേക്ക് തിരികെ കൊണ്ടുവന്നു.
ക്യു മെലോഡിയ അഡ്മിന്‍ റഊഫ് മലയില്‍, വിജയമന്ത്രങ്ങള്‍ അവതാരകന്‍ റാഫി പാറക്കാട്ടില്‍, ജാഫര്‍ മുറിച്ചാണ്ടി, നിഷാദ് എന്നിവരും ഗാനങ്ങള്‍ അവതരിപ്പിച്ച് സംഗീതസായാഹ്നത്തെ ശ്രദ്ധേയമാക്കി.
പരിപാടിയുടെ സംഗീതഭംഗി വര്‍ധിപ്പിച്ചത് അസ് ലം പൊന്മുണ്ടം (ഹാര്‍മോണിയം), മാര്‍ട്ടിന്‍ (തബല), മുഹമ്മദ് സഫ്വാന്‍ (ഗിറ്റാര്‍) എന്നിവരായിരുന്നു. ഇവരുടെ മനോഹരമായ സംഗീതസഹകരണം ഉമ്പായിയുടെ ഗസലുകളുടെ ആത്മാവിനെ കൂടുതല്‍ തീവ്രമാക്കി.
മീഡിയ പ്ലസ് സി.ഇ.ഒ. ഡോ. അമാനുല്ല വടക്കാങ്ങര, ലോക കേരള സഭാംഗം അബ്ദുല്‍ റഊഫ് കൊണ്ടോട്ടി, മേഘമല്‍ഹാര്‍ അഡ്മിന്‍ മുംതാസ്, ജാസ്മിന്‍ റാഫി എന്നിവര്‍ വിശിഷ്ടാതിഥികളായി പങ്കെടുത്തു. ഉമ്പായി മലയാള സംഗീതത്തിന് നല്‍കിയ അമൂല്യ സംഭാവനകളെയും ഗസല്‍ സംഗീതത്തെ ജനകീയമാക്കിയ അദ്ദേഹത്തിന്റെ പങ്കിനെയും അവര്‍ അനുസ്മരിച്ചു.
ഉമ്പായിയുടെ ഗാനങ്ങള്‍ വെറും സംഗീതസൃഷ്ടികളല്ല, മനുഷ്യഹൃദയത്തിന്റെ വികാരങ്ങള്‍ക്ക് ശബ്ദം നല്‍കിയ അനശ്വര കലാസൃഷ്ടികളാണെന്നും, ആ പാരമ്പര്യം സംരക്ഷിക്കുകയും അടുത്ത തലമുറയിലേക്ക് എത്തിക്കുകയും ചെയ്യുന്നത് ഓരോ സംഗീതസ്‌നേഹിയുടെയും ഉത്തരവാദിത്തമാണെന്നും പരിപാടിയില്‍ സംസാരിച്ചവര്‍ അഭിപ്രായപ്പെട്ടു.
ഗുരുവിന്റെ ഓര്‍മകളെയും ഗാനങ്ങളെയും ഹൃദയത്തില്‍ സൂക്ഷിച്ചുകൊണ്ട് സംഗീതത്തിലൂടെ ആദരാഞ്ജലി അര്‍പ്പിച്ച ഈ സായാഹ്നം, ഉമ്പായിയുടെ സംഗീതം കാലാതീതമാണെന്നും അദ്ദേഹത്തിന്റെ ശബ്ദം എന്നും സംഗീതാസ്വാദകരുടെ മനസ്സില്‍ ജീവിച്ചിരിക്കുമെന്നും ഒരിക്കല്‍ക്കൂടി ഓര്‍മിപ്പിക്കുന്നതായി മാറി.
