ദോഹ: ആധുനിക വൈദ്യശാസ്ത്ര ചികിത്സകൾക്കും ജീവിതശൈലീ മാറ്റങ്ങൾക്കുമൊപ്പം സംഗീതം പ്രയോജനപ്പെടുത്തുന്നത് ഹൃദയാരോഗ്യം മെച്ചപ്പെടുത്താൻ സഹായിക്കുമെന്ന് പ്രമുഖ കാർഡിയോളജിസ്റ്റ് ഡോ. മോണിക്ക ഖേർ വ്യക്തമാക്കുന്നു. ലോക ഹൃദയ ദിനത്തോട് അനുബന്ധിച്ച് തയ്യാറാക്കിയ കുറിപ്പിലാണ് അൽ ഹിലാൽ ആസ്റ്റർ ഹോസ്പിറ്റലിലെ കാർഡിയോളജി വിഭാഗം വിദഗ്ദ്ധയായ ഡോ. മോണിക്ക സംഗീതവും ഹൃദയവും തമ്മിലുള്ള ബന്ധത്തെക്കുറിച്ച് വിശദീകരിക്കുന്നത്.
മന്ദതാളത്തിലുള്ളതും ശാന്തവുമായ സംഗീതം കേൾക്കുന്നത് രക്തസമ്മർദ്ദവും ഹൃദയമിടിപ്പിന്റെ നിരക്കും കുറയ്ക്കാൻ സഹായിക്കുമെന്ന് ശാസ്ത്രീയ പഠനങ്ങൾ വ്യക്തമാക്കുന്നു. ഇത് ശരീരത്തിലെ സമ്മർദ്ദ ഹോർമോണുകളുടെ അളവ് കുറയ്ക്കുകയും നാഡീവ്യൂഹത്തിന് വിശ്രമം നൽകുകയും ചെയ്യുന്നു.
ഹൃദ്രോഗികൾ ദിനവും 30 മിനിറ്റ് ശാന്തമായ സംഗീതം ആസ്വദിക്കുന്നത് മാനസികസമ്മർദ്ദവും ഉത്കണ്ഠയും കുറയ്ക്കുമെന്നും, ഹൃദയശസ്ത്രക്രിയക്ക് വിധേയരായവരിൽ വേദനയുടെ കാഠിന്യം കുറയ്ക്കാൻ സംഗീത ചികിത്സ (Music Therapy) ഉപകരിക്കുമെന്നും വൻകിട പഠനങ്ങൾ ചൂണ്ടിക്കാണിക്കുന്നു.
എന്നിരുന്നാലും കൃത്യമായ വ്യായാമം, സമീകൃതാഹാരം, പുകവലി ഉപേക്ഷിക്കൽ, കൃത്യമായ മരുന്നുകൾ, രക്തസമ്മർദ്ദവും പ്രമേഹവും നിയന്ത്രിക്കൽ തുടങ്ങിയ പ്രധാന ആരോഗ്യ ശീലങ്ങൾക്ക് പകരമല്ല സംഗീതം. മറിച്ച്, സമഗ്രമായ ഹൃദയാരോഗ്യ പരിചരണത്തിന് അനുബന്ധമായി പ്രയോജനപ്പെടുത്താവുന്ന ഒന്നാണ് ഇതെന്നും ഡോക്ടർ ഓർമ്മിപ്പിക്കുന്നു.
