​ന്യൂഡൽഹി: മുനമ്പത്തെ വിവാദ ഭൂമി വഖഫ് സ്വത്തല്ലെന്ന കേരള ഹൈക്കോടതി ഡിവിഷൻ ബെഞ്ചിന്റെ സുപ്രധാന വിധി സുപ്രീംകോടതി സ്റ്റേ ചെയ്തു. ഇതോടെ, ഹൈക്കോടതി വിധിക്ക് മുമ്പുള്ള തൽസ്ഥിതി (Status Quo) തുടരുമെന്ന് സുപ്രീംകോടതി വ്യക്തമാക്കി. ജസ്റ്റിസുമാരായ മനോജ് മിശ്ര, ഉജ്ജൽ ഭുയാൻ എന്നിവരടങ്ങിയ ബെഞ്ചാണ് നിർണായകമായ ഈ ഉത്തരവ് പുറപ്പെടുവിച്ചത്.
​വഖഫ് സ്വത്തുമായി ബന്ധപ്പെട്ട വിഷയം കോഴിക്കോട്ടെ വഖഫ് ട്രൈബ്യൂണലിന്റെ സജീവ പരിഗണനയിലിരിക്കെ, ഹൈക്കോടതിക്ക് എങ്ങനെ ഭൂമിയുടെ സ്വഭാവം നിർണയിക്കാൻ കഴിഞ്ഞുവെന്ന് സുപ്രീംകോടതി ആശ്ചര്യം പ്രകടിപ്പിച്ചു. ജുഡീഷ്യൽ കമ്മിഷനെ നിയമിച്ചതുമായി ബന്ധപ്പെട്ട ഒരു റിട്ട് ഹർജിയാണ് ഹൈക്കോടതിയുടെ മുന്നിലെത്തിയത്. ആ ഹർജി നിലനിൽക്കുമോ ഇല്ലയോ എന്നതിൽ മാത്രം തീരുമാനമെടുത്ത് നിർത്തണമായിരുന്നുവെന്നും, എന്നാൽ അധികാരം കവിഞ്ഞ് കോടതി മുന്നോട്ട് പോയെന്നും സുപ്രീംകോടതി നിരീക്ഷിച്ചു. വിഷയം വിശദമായി പരിശോധിക്കുമെന്നും ബെഞ്ച് വ്യക്തമാക്കി.
​സർക്കാർ നിലപാടിനോട് വിയോജിപ്പ്
​സംസ്ഥാന സർക്കാർ വിധിയെ അപ്പീൽ മുഖേന സുപ്രീംകോടതിയിൽ ചോദ്യംചെയ്യണമായിരുന്നുവെന്നും കോടതി നിരീക്ഷിച്ചു. എന്നാൽ, ഹർജിയെ സംസ്ഥാന സർക്കാർ എതിർക്കുകയാണ് ചെയ്തത്. കേരള വഖഫ് സംരക്ഷണ വേദി പോലുള്ള പുറത്തുനിന്നുള്ള കക്ഷികൾക്ക് ഹർജി നൽകാൻ അധികാരമില്ലെന്നും, വഖഫിന്റെ മുത്തവല്ലി ഹൈക്കോടതിയെ സമീപിച്ചിട്ടില്ലെന്നും മുതിർന്ന അഭിഭാഷകൻ ജയ്ദീപ് ഗുപ്‌ത സർക്കാരിന് വേണ്ടി വാദിച്ചു. കൂടാതെ, ജുഡീഷ്യൽ കമ്മിഷൻ സർക്കാരിന് റിപ്പോർട്ട് സമർപ്പിച്ചുകഴിഞ്ഞെന്നും അറിയിച്ചു.
​കമ്മിഷന് തുടർന്ന് പ്രവർത്തിക്കാം
​മുനമ്പത്തെ ഭൂമിയെക്കുറിച്ച് അന്വേഷിക്കാൻ റിട്ട. ജസ്റ്റിസ് സി.എൻ. രാമചന്ദ്രൻ നായരെ ജുഡീഷ്യൽ കമ്മിഷനായി സംസ്ഥാന സർക്കാർ നിയമിച്ചതിനെ ഹൈക്കോടതി ശരിവച്ചിരുന്നു. ഈ നടപടി സ്റ്റേ ചെയ്യാനുള്ള അപേക്ഷ സുപ്രീംകോടതി തള്ളി. അതിനാൽ ജുഡീഷ്യൽ കമ്മിഷന് പ്രവർത്തനം തുടരുന്നതിൽ തടസ്സമില്ല.
​വഖഫ് സംരക്ഷണ വേദിയും ടി.എം. അബ്‌ദുൾ സലാമും സമർപ്പിച്ച ഹർജികളാണ് സുപ്രീംകോടതി പരിഗണിച്ചത്. എതിർകക്ഷികളായ സംസ്ഥാന സർക്കാർ, ജുഡീഷ്യൽ അന്വേഷണ കമ്മിഷൻ, സംസ്ഥാന വഖഫ് ബോർഡ്, ഫറൂഖ് കോളേജ് മാനേജിംഗ് കമ്മിറ്റി എന്നിവരടക്കമുള്ളവർക്ക് നോട്ടീസ് അയക്കാൻ കോടതി ഉത്തരവിട്ടു. കേസ് അടുത്ത വർഷം ജനുവരി അവസാനവാരം വിശദമായി വാദം കേൾക്കും.
​ഹൈക്കോടതി വിധി
​കഴിഞ്ഞ ഒക്‌ടോബറിലാണ് മുനമ്പത്തെ ഭൂമി കോഴിക്കോട് ഫറൂഖ് കോളേജിനുള്ള ഇഷ്ടദാനമായിരുന്നു എന്ന് ഹൈക്കോടതി വിധിച്ചത്. 1995ലെ വഖഫ് നിയമത്തിലെ വ്യവസ്ഥകൾക്ക് എതിരായാണ് ഈ ഭൂമി വഖഫായി രജിസ്റ്റർ ചെയ്തതെന്നും ഹൈക്കോടതി കണ്ടെത്തിയിരുന്നു. ഈ വിധിയിൽ നിന്നുള്ള തിരിച്ചടിയാണ് സുപ്രീംകോടതിയുടെ ഇപ്പോഴത്തെ സ്റ്റേ ഉത്തരവ്.