ഒരു കോടി ആളുകളെ കൊലപ്പെടുത്തും; ഗണേശോത്സവത്തിനിടെ മുംബൈ നഗരത്തിൽ ബോംബ് സ്ഫോടനം നടത്തുമെന്ന് ഭീഷണി
ഗണേശോത്സവത്തിനിടെ മുംബൈ നഗരത്തിൽ ബോംബ് സ്ഫോടനം നടത്തുമെന്ന് ഭീഷണി. ഗണേശോത്സവം നാളെ സമാപിക്കാനിരിക്കെയാണ് അജ്ഞാതന്റെ ഭീഷണി സന്ദേശം പൊലീസിന് ലഭിച്ചത്. മുംബൈ നഗരത്തിൽ 34 വാഹനങ്ങളിൽ ആർഡിഎക്സ് ഉണ്ടെന്ന് പൊലീസിന് വാട്സാപ്പിലാണ് സന്ദേശം ലഭിച്ചത്. ഇതിനു പിന്നാലെ മുംബൈ നഗരത്തിൽ സുരക്ഷാസംവിധാനം ശക്തമാക്കി.
ട്രാഫിക് പൊലീസിന്റെ കൺട്രോൾ റൂമിലേക്കാണ് വാട്ട്‌സ്ആപ്പ് ഹെൽപ്പ്‌ലൈനിൽ ഭീഷണി സന്ദേശം ലഭിച്ചത്. 14 പാക്കിസ്ഥാൻ ഭീകരർ ഇന്ത്യയിലേക്ക് കടന്നിട്ടുണ്ടെന്നും ഭീഷണി സന്ദേശത്തിൽ പറയുന്നു. സ്ഫോടനത്തിനായി ഏകദേശം 400 കിലോഗ്രാം ആർഡിഎക്സ് ഉപയോഗിക്കുമെന്നും ഒരു കോടി ആളുകളെ കൊലപ്പെടുത്തുമെന്നും ഭീഷണി സന്ദേശത്തിൽ പറയുന്നു. തീവ്രവാദ വിരുദ്ധ സ്ക്വാഡ് (എടിഎസ്) സംഭവത്തിൽ അന്വേഷണം ആരംഭിച്ചിട്ടുണ്ട്.
പത്ത് ദിവസത്തെ ഗണേശോത്സവത്തിന്റെ സമാപന ചടങ്ങായ അനന്ത ചതുർത്ഥി ആഘോഷത്തിനായി തയ്യാറെടുക്കവെയാണ് മുംബൈയിൽ സ്ഫോടന പരമ്പര നടക്കുമെന്ന മുന്നറിയിപ്പ് ലഭിച്ചിരിക്കുന്നത്.
