കൊച്ചി: പാതിവില തട്ടിപ്പ് കേസിൽ പ്രതികളെ രക്ഷപെടുത്താൻ സിപിഎം - ബിജെപി നേതൃത്വം ശ്രമിക്കുന്നതായി ഡിസിസി പ്രസിഡന്റ് മുഹമ്മദ് ഷിയാസ്. ബിജെപി നേതാവ് എ എൻ രാധാകൃഷ്ണൻ അടക്കമുള്ളവർ ഉൾപ്പെട്ട കേസിൽ പ്രതികളെ രക്ഷിക്കാൻ സിപിഎം നേതാക്കൾ കടുത്ത സമ്മർദം ചെലുത്തുകയാണെന്ന് ഷിയാസ് ആരോപിച്ചു. പ്രത്യേക അന്വേഷണ സംഘം പിരിച്ചു വിട്ടത് സിപിഎം - ബിജെപി ഒത്തുതീർപ്പിൻറെ ഭാഗമാണ്. ആരോപണ വിധേയനായ എ എൻ രാധാകൃഷ്ണനെ എൻ ഡി എ സംസ്‌ഥാന വൈസ് ചെയർമാനാക്കിയ ബിജെപി തട്ടിപ്പിനിരയായവരെ പരിഹസിക്കുകയാണ്. വോട്ടുകച്ചവടം നടത്തി പതിവില തട്ടിപ്പ് കേസും ഇല്ലാതാക്കാനാണ് ഇരു പാർട്ടികളും ശ്രമിക്കുന്നത്. കേസിലെ പ്രധാന പ്രതിയായ അനന്തുകൃഷ്ണനെ പൊലീസ് വഴിവിട്ട് സഹായിക്കുകയാണ്. തട്ടിപ്പിനിരയായവർ ഇപ്പോഴും പോലീസ് സ്റ്റേഷനുകളും എ എൻ രാധാകൃഷ്ണന്റെ ഓഫീസും കയറിയിറങ്ങുകയാണ്. പണം നൽകി പോലീസിനെ സ്വാധീനിക്കാനും ശ്രമങ്ങൾ നടക്കുന്നു. ആക്ഷൻ കൗസിൽ നടത്തുന്ന പ്രക്ഷോഭങ്ങൾക്ക് കോൺഗ്രസ് പിന്തുണ നൽകും. പാതിവില തട്ടിപ്പ് കേസ് അട്ടിമറിക്കാനുള്ള നീക്കങ്ങൾക്കെതിരെ കോൺഗ്രസ് ശക്തമായ പ്രക്ഷോഭം ആരംഭിക്കുമെന്നും മുഹമ്മദ് ഷിയാസ് മുന്നറിയിപ്പ് നൽകി.
Photo Courtesy - Google
