ദോഹ: ഖത്തറിലെ ഹമദ് തുറമുഖത്ത് പുതിയ ചരിത്രം കുറിച്ച് ലോകത്തിലെ ഏറ്റവും വലിയ കണ്ടെയ്‌നർ കപ്പലുകളിലൊന്നായ 'എം.എസ്.സി മാരിയെല്ല' (MSC Mariella) നങ്കൂരമിട്ടു. ഹമദ് തുറമുഖത്തിന്റെ പ്രവർത്തനചരിത്രത്തിൽ ഇതാദ്യമായാണ് ഇത്രയും വലിയൊരു അൾട്രാ-ലാർജ് കണ്ടെയ്‌നർ വെസൽ (ULCV) ഇവിടെ എത്തുന്നത്. തുറമുഖത്തിന്റെ നടത്തിപ്പുകാരായ ക്യു-ടെർമിനൽസ് (QTerminals) ആണ് ഈ സുപ്രധാന നേട്ടം ഔദ്യോഗികമായി അറിയിച്ചത്.
ഏകദേശം 24,346 ടി.ഇ.യു (TEU) ശേഷിയുള്ള ഈ കൂറ്റൻ കപ്പലിനെ കൈകാര്യം ചെയ്യുന്നതിലൂടെ ഹമദ് തുറമുഖത്തിന്റെ പ്രവർത്തനക്ഷമതയും ആധുനിക സൗകര്യങ്ങളും ഒരിക്കൽ കൂടി തെളിയിക്കപ്പെട്ടിരിക്കുകയാണ്. ഇതിനുമുമ്പ് തുറമുഖത്ത് എത്തിയ ഏറ്റവും വലിയ കപ്പലിനേക്കാൾ ഏകദേശം 700 മുതൽ 800 വരെ ടി.ഇ.യു അധിക ശേഷിയുണ്ട് എം.എസ്.സി മാരിയെല്ലയ്ക്ക്.
ഖത്തറിന്റെ വളർച്ചയുടെയും മികവിന്റെയും പാതയിലെ നിർണായകമായ ഒരു നാഴികക്കല്ലായാണ് ഇതിനെ വിലയിരുത്തുന്നത്. ലോകത്തിലെ വമ്പൻ കപ്പലുകളെയും ചരക്കുനീക്കങ്ങളെയും സ്വീകരിക്കാൻ ഹമദ് തുറമുഖം പൂർണ്ണ സജ്ജമാണെന്നതിന്റെ വിളംബരം കൂടിയാണിത്. സമുദ്ര വ്യാപാര മേഖലയിൽ ഖത്തറിനെ ഒരു ആഗോള ഹബ്ബാക്കി മാറ്റുന്നതിനുള്ള ശ്രമങ്ങൾക്ക് ഈ നേട്ടം കൂടുതൽ കരുത്തുപകരും.
