മാസച്യുസെറ്റ്സ്: ഫിഫ ലോകകപ്പ് ഗ്രൂപ്പ് സി പോരാട്ടത്തിൽ സ്കോട്ലൻഡിനെ ഏകപക്ഷീയമായ ഒരു ഗോളിന് കീഴടക്കി മൊറോക്കോ നിർണായക ജയം സ്വന്തമാക്കി. രണ്ട് മത്സരങ്ങളിൽ നിന്ന് നാല് പോയിന്റുമായി അറ്റ്ലസ് ലയൺസ് നോക്കൗട്ട് സാധ്യതകൾ കൂടുതൽ ശക്തമാക്കുകയും ഗ്രൂപ്പിലെ ഒന്നാം സ്ഥാനത്തേക്ക് ഉയരുകയും ചെയ്തു.
മത്സരം ആരംഭിച്ച് വെറും 71 സെക്കൻഡുകൾക്കുള്ളിൽ തന്നെ മൊറോക്കോ ലീഡ് നേടി. ബ്രാഹിം ദിയാസ് വലതുവിങ്ങിലേക്ക് നൽകിയ കൃത്യതയാർന്ന ലോങ് പാസ് സ്വീകരിച്ച ഇസ്മയെൽ സൈബാറി, സ്കോട്ലൻഡ് ഗോൾകീപ്പർ ആൻഗസ് ഗണ്ണിനെ മറികടന്ന് പന്ത് വലയിലെത്തിച്ചു. ഈ ലോകകപ്പിലെ ഇതുവരെയുള്ള ഏറ്റവും വേഗമേറിയ ഗോളെന്ന റെക്കോർഡും ഈ നേട്ടത്തിനൊപ്പമെത്തി. ബ്രസീലിനെതിരായ ആദ്യ മത്സരത്തിലും ഗോൾ നേടിയിരുന്ന സൈബാറി തുടർച്ചയായ രണ്ടാം മത്സരത്തിലും ടീമിന്റെ രക്ഷകനായി.
ആദ്യ ഗോളിന് പിന്നാലെ മൊറോക്കോ ആക്രമണങ്ങൾ ശക്തമാക്കി. പത്താം മിനിറ്റിൽ സൈബാറിയുടെ ക്രോസിൽ നിന്ന് മറ്റൊരു അവസരം ലഭിച്ചെങ്കിലും അത് ഗോളാക്കി മാറ്റാൻ മുന്നേറ്റനിരയ്ക്ക് സാധിച്ചില്ല. 18-ാം മിനിറ്റിൽ അഷ്റഫ് ഹക്കീമിയുടെ ശ്രമം ഗോൾകീപ്പർ ആൻഗസ് ഗൺ മികച്ച സേവ് നടത്തി തടഞ്ഞു.
മൊറോക്കോ തുടർച്ചയായി സമ്മർദം ചെലുത്തിയതോടെ സ്കോട്ലൻഡ് പ്രതിരോധത്തിലേക്ക് ഒതുങ്ങി. ആദ്യ പകുതിയിൽ കാര്യമായ ആക്രമണ അവസരങ്ങളൊന്നും സൃഷ്ടിക്കാനാകാതിരുന്ന സ്കോട്ലൻഡ്, ഇൻജുറി ടൈമിലാണ് ആദ്യമായി ആക്രമണ ഭാവം പുറത്തെടുത്തത്. തുടർച്ചയായ മുന്നേറ്റങ്ങളിലൂടെ മൊറോക്കൻ പ്രതിരോധത്തെ പരീക്ഷിച്ചെങ്കിലും സമനില ഗോൾ കണ്ടെത്താനായില്ല.
രണ്ടാം പകുതിയിലും ഇരു ടീമുകളും അവസരങ്ങൾ സൃഷ്ടിച്ചെങ്കിലും ഫിനിഷിങ്ങിലെ പിഴവുകൾ കാരണം സ്കോർബോർഡിൽ മാറ്റമുണ്ടായില്ല. അവസാന നിമിഷങ്ങളിൽ സമനിലക്കായി സ്കോട്ലൻഡ് ശക്തമായി ശ്രമിച്ചെങ്കിലും മൊറോക്കോ പ്രതിരോധം ഉറച്ചുനിന്നു.
അവസാന വിസിൽ മുഴങ്ങുമ്പോൾ സൈബാറിയുടെ ആദ്യ മിനിറ്റിലെ ഗോൾ തന്നെ മത്സരഫലം നിർണയിച്ചിരുന്നു. ജയത്തോടെ നാല് പോയിന്റ് നേടിയ മൊറോക്കോ ഗ്രൂപ്പ് സിയിലെ ഒന്നാം സ്ഥാനത്തേക്ക് മുന്നേറി.
