തമിഴ് സിനിമയിലെ മുൻനിര നായകന്മാരിൽ ഒരാളായ ശിവകാർത്തികേയൻ ഇപ്പോൾ അഭിനയിച്ചു കൊണ്ടിരിക്കുന്ന ചിത്രങ്ങൾ എ.ആർ.മുരുകദാസ് സംവിധാനം ചെയ്യുന്ന 'മദരാസി'യും, സുധ കൊങ്ങര സംവിധാനം ചെയ്യുന്ന 'പരാശക്തി'യുമാണ്. ഇതിൽ 'മദരാസി' ആദ്യം തിയേറ്ററുകളിൽ എത്തുമെന്നാണ് റിപ്പോർട്ട്. 'പരാശക്തി'യുടെ ചിത്രീകരണവും പുരോഗമിക്കുകയാണ്. ഈ ചിത്രത്തിന്റെ ഷൂട്ടിങ്ങ് തീർന്നതും ശിവകാർത്തികേയൻ ചുരുങ്ങിയ കാലയളവിൽ ഒരുക്കാനിരിക്കുന്ന ഒരു സിനിമയിൽ അഭിനയിക്കാൻ പോകുകയാണെന്നുള്ള വിവരം പുറത്തുവന്നിട്ടുണ്ട്. ഈ ചിത്രം സംവിധാനം ചെയ്യുന്നത് സൂപ്പർഹിറ്റായ 'ഗുഡ് നൈറ്റ്' എന്ന ചിത്രം സംവിധാനം ചെയ്ത വിനായക് ചന്ദ്രശേഖരാണ്. 'പാഷൻ സ്റ്റുഡിയോസ് ആണ് ഈ സിനിമ നിർമ്മിക്കുന്നത്. അച്ഛനും, മകനും തമ്മിലുള്ള ബന്ധത്തിന്റെ കഥ പറയുന്ന ഒരു സിനിമയായിട്ടാണത്രെ ഇത് ഒരുങ്ങുന്നത്. ഈ ചിത്രത്തിൽ ശിവകാർത്തികേയന്റെ അച്ഛനായി അഭിനയിക്കാൻ നടൻ മോഹൻലാലുമായി സംവിധായകൻ വിനായക് ചന്ദ്രശേഖർ ഈയിടെ ചർച്ചകൾ നടത്തി എന്നും, താരം ഈ ചിത്രത്തിൽ അഭിനയിക്കാൻ സമ്മതിച്ചിട്ടുണ്ട് എന്നുള്ള വാർത്തകളാണ് ഇപ്പോൾ കോളിവുഡിൽ പുറത്തുവന്നു വൈറലായിക്കൊണ്ടിരിക്കുന്നത്. എന്നാൽ ഇത് സംബന്ധമായുള്ള ഔദ്യോഗിക റിപ്പോർട്ടുകളൊന്നും ഇതുവരെ പുറത്തുവന്നിട്ടില്ല. രജിനികാന്തിനൊപ്പം 'ജയിലർ' ഒന്നാം ഭാഗത്തിൽ അഭിനയിച്ച മോഹൻ ലാൽ, 'ജയിലർ' രണ്ടാം ഭാഗത്തിലും ഉണ്ടായിരിക്കുമെന്നുള്ള റിപ്പോർട്ടുകളുമുണ്ട്.
Photo Courtesy - Google
