മോദിയുടെ രാമേശ്വരം സന്ദർശനത്തോടനുബന്ധിച്ച് മസ്ജിദിന്റെ മിനാരം മറച്ചെന്ന് ആരോപണം
പ്രധാനമന്ത്രി നരേന്ദ്ര മോദിയുടെ രാമേശ്വരം സന്ദർശനത്തോടനുബന്ധിച്ച് മസ്ജിദിന്റെ മിനാരം മറച്ചെന്ന് ആരോപണം. രാമേശ്വരം പാമ്പനിലെ മുസ്‍ലിം പള്ളി മിനാരത്തിന്റെ മുകൾ ഭാഗം മറച്ചെന്നാണ് ഇപ്പോൾ ഉയരുന്ന ആരോപണം. മിനാരത്തിന്റെ മുകളിൽ അറബിയിലും ഇംഗ്ലീഷിലും ‘അല്ലാഹു അക്ബർ’ എന്ന എഴുത്താണ് ടാർപോളിൻ ഉപയോഗിച്ച് മറച്ചതെന്നാണ് ആരോപണം.
ജില്ല പൊലീസ് അധികൃതരാണ് ഇത്തരത്തിൽ മിനാരം മറച്ചതെന്നാണ് പ്രചരിക്കുന്ന വാർത്ത. പ്രധാനമന്ത്രിയുടെ പ്രത്യേക സുരക്ഷ വിഭാഗം ഉദ്യോഗസ്ഥരുടെ നിർദേശാനുസരണമാണ് പൊലീസിന്റെ നടപടിയെന്നും റിപ്പോർട്ടിൽ ആരോപിക്കുന്നു. എന്നാൽ, ഇതുസംബന്ധിച്ച് ഇനിയും ഔദ്യോഗിക വിശദീകരണങ്ങൾ പുറത്തുവന്നിട്ടില്ല.
പൊതു സർക്കാർ പരിപാടി നടക്കുന്നതിനാൽ മതചിഹ്നങ്ങൾ ഒഴിവാക്കുന്നതിന്റെ ഭാഗമായാണ് മിനാരം മറച്ചതെന്നാണ് പറയപ്പെടുന്നത്. നടപടി അപലപനീയമാണെന്ന് വിവിധ മുസ്‍ലിം സംഘടനകൾ പ്രതികരിച്ചു. പള്ളി മിനാരം മൂടിയത് പ്രതിഷേധാർഹമാണെന്ന് എസ്.ഡി.പി.ഐ തമിഴ്നാട് സെക്രട്ടറി അഹമദ് നവി പറഞ്ഞു.
