ദോഹ:ഹൈസ്‌കൂൾ വിദ്യാർത്ഥികളുടെ കരിയർ വഴികൾ വ്യക്തമായി നിർണയിക്കാനും തൊഴിൽ ബോധവൽക്കരണം ശക്തിപ്പെടുത്താനും ലക്ഷ്യമിട്ട് സംഘടിപ്പിച്ച ‘മൈ കരിയർ–മൈ ഫ്യൂച്ചർ’ പരിശീലന പരിപാടിയുടെ ശീതകാല പതിപ്പിൽ തൊഴിൽ മന്ത്രാലയം (MoL) പങ്കെടുത്തു. ഖത്തർ ഫൗണ്ടേഷൻ സ്ഥാപിച്ച ഖത്തർ കരിയർ ഡെവലപ്‌മെന്റ് സെന്റർ (QCDC),വിദ്യാഭ്യാസ–ഉന്നത വിദ്യാഭ്യാസ മന്ത്രാലയത്തിന്റെ സഹകരണത്തോടെയാണ്പരിപാടിസംഘടിപ്പിച്ചത്.തൊഴിൽ മന്ത്രാലയത്തിലെ ക്വാളിഫൈയിംഗ് ആൻഡ് സ്കിൽസ് ഡെവലപ്‌മെന്റ് വകുപ്പാണ് നേതൃത്വം നൽകിയത്. ഹൈസ്‌കൂൾ തലത്തിൽ തന്നെ അനുയോജ്യമായ കരിയർ വഴികൾ തിരിച്ചറിയുന്നത് ദൃഢമായ തൊഴിൽ ഭാവി നിർമ്മിക്കാൻ നിർണായകമാണെന്ന് വകുപ്പ് ആക്ടിംഗ് ഡയറക്ടർ മുഹമ്മദ് സാലം അൽ ഖുലൈഫി പറഞ്ഞു.
ആദ്യഘട്ട തൊഴിൽ പരിചയം വിദ്യാർത്ഥികൾക്ക് അവരുടെ താൽപര്യങ്ങളും കഴിവുകളും കണ്ടെത്താനും തൊഴിൽ വിപണിയിലെ അക്കാദമിക്–പ്രൊഫഷണൽ സാധ്യതകൾ മനസ്സിലാക്കാനും സഹായിക്കുമെന്നും അദ്ദേഹം ചൂണ്ടിക്കാട്ടി. കരിയർ മാർഗനിർദേശം, വർക്ക്‌ഷോപ്പുകൾ, മൂല്യനിർണയങ്ങൾ എന്നിവ വഴി അനിയന്ത്രിതമായ തീരുമാനങ്ങളിൽ നിന്ന് വിട്ടുനിന്ന് ആത്മവിശ്വാസത്തോടെ ഭാവി തിരഞ്ഞെടുക്കാൻ വിദ്യാർത്ഥികൾക്ക് സാധിക്കുമെന്നും അദ്ദേഹം കൂട്ടിച്ചേർത്തു.
അഞ്ചുദിവസം നീളുന്ന പരിപാടിയിൽ ജോബ് ഷാഡോയിംഗ് മുഖേന യഥാർത്ഥ ജോലി അന്തരീക്ഷത്തിൽ നേരിട്ടുള്ള പരിശീലനമാണ് നൽകുന്നത്. ധനകാര്യ സേവന മേഖലക്ക് പ്രത്യേക ഊന്നൽ നൽകിയിരിക്കുന്നതോടൊപ്പം ആരോഗ്യ, ലജിസ്റ്റിക്സ്, നിർമ്മാണം, വിവര സാങ്കേതികവിദ്യ, ഡിജിറ്റൽ സേവനങ്ങൾ, നിർമാണം തുടങ്ങിയ മേഖലകളിലും പരിശീലനം ഉൾപ്പെടുത്തിയിട്ടുണ്ട്. പരിശീലനം വിജയകരമായി പൂർത്തിയാക്കുന്നവർക്ക് പങ്കാളിത്ത സർട്ടിഫിക്കറ്റ് നൽകും.
മനുഷ്യ വിഭവ വികസനത്തിന് ഊന്നൽ നൽകുന്ന ദേശീയ ശ്രമങ്ങളുടെ ഭാഗമായാണ് ഈ പദ്ധതി നടപ്പാക്കുന്നതെന്നും, ഭാവിയിൽ വൈവിധ്യമാർന്ന അറിവ് ആധാരിത സമ്പദ്‌വ്യവസ്ഥക്ക് ആവശ്യമായ ശക്തമായ തൊഴിൽശക്തി രൂപപ്പെടുത്തുക എന്നതാണ് ലക്ഷ്യമെന്നും അധികൃതർ വ്യക്തമാക്കി.