ദോഹ: നയതന്ത്ര കോൺസുലർ കോർപ്സുകളിലെ തസ്തികകളുടെ വിവരണവും വർഗ്ഗീകരണവും വ്യക്തമാക്കുന്ന പുതിയ ഗൈഡ് പുറത്തിറക്കി. വിദേശകാര്യ മന്ത്രാലയത്തിലെ സ്ഥാപനപരമായ പ്രവർത്തന സംവിധാനം വികസിപ്പിക്കുന്നതിനും ശക്തിപ്പെടുത്തുന്നതിനുമുള്ള ശ്രമങ്ങളുടെ ഭാഗമായി, പ്രധാനമന്ത്രിയും വിദേശകാര്യ മന്ത്രിയുമായ ശൈഖ് മുഹമ്മദ് ബിൻ അബ്ദുറഹ്മാൻ ബിൻ ജാസിം അൽ താനി 2026-ലെ 34-ാം നമ്പർ മന്ത്രാലയ തീരുമാനം വഴിയാണ് ഗൈഡിന് അംഗീകാരം നൽകിയത്.
മന്ത്രാലയത്തിന്റെ ജനറൽ ഓഫീസിലും വിദേശങ്ങളിലെ സ്റ്റേറ്റ് മിഷനുകളിലും (എംബസികൾ, കോൺസുലേറ്റുകൾ) ജോലി ചെയ്യുന്ന ഉദ്യോഗസ്ഥരുടെ ചുമതലകളും ഉത്തരവാദിത്തങ്ങളും കൂടുതൽ സുതാര്യമാക്കുക, ഉദ്യോഗസ്ഥരുടെ പ്രവർത്തനക്ഷമത വർദ്ധിപ്പിക്കുക, ഉത്തരവാദിത്തബോധം ഉറപ്പാക്കുക എന്നിവയാണ് ഈ പുതിയ പരിഷ്കരണത്തിലൂടെ ലക്ഷ്യമിടുന്നത്.നയതന്ത്ര, കോൺസുലർ ഉദ്യോഗസ്ഥർക്ക് ഒരു സംഘടനാപരമായ റഫറൻസ് ആയി ഈ ഗൈഡ് പ്രവർത്തിക്കും. മന്ത്രാലയത്തിലെ വിവിധ കരിയർ പാതകൾ വ്യക്തമാക്കുന്നതിനും നടപടിക്രമങ്ങൾ ഏകീകരിക്കുന്നതിനും ഇത് ഏറെ സഹായകരമാകും.
തസ്തികകളെക്കുറിച്ചും ജോബ് ടൈറ്റിലുകളെക്കുറിച്ചും കൃത്യവും സമഗ്രവുമായ വിവരങ്ങൾ നൽകുന്നതിലൂടെ ജീവനക്കാരുടെ പ്രൊഫഷണൽ വികസനം, പ്രകടനക്ഷമത ഉയർത്തൽ, ഉത്തരവാദിത്തങ്ങളിലെ വ്യക്തത എന്നിവ പുതിയ ഗൈഡ് ഉറപ്പുനൽകുന്നു. കൂടാതെ, മന്ത്രാലയത്തിന്റെ ഓർഗനൈസേഷണൽ സ്ട്രക്ചറിന് അനുസൃതമായി റിക്രൂട്ട്‌മെന്റ് നടപടികളും കരിയർ ഡെവലപ്‌മെന്റും കൂടുതൽ സുഗമമാക്കാൻ ഈ പുതിയ പരിഷ്കാരത്തിലൂടെ സാധിക്കുമെന്നും മന്ത്രാലയം വ്യക്തമാക്കി.
