ദോഹ: ഖത്തറിലെ മരുഭൂമി പരിസ്ഥിതിയുടെ സംരക്ഷണവും സുസ്ഥിരതയും ഉറപ്പാക്കാനുള്ള ദേശീയ പരിശ്രമങ്ങളുടെ ഭാഗമായി, അൽ-കരാനയ്ക്ക് എതിർവശത്തുള്ള റൗദത്ത് ഉം അൽ ജമാജിമിൽ (Rawdat Umm Al Jamajim) സമഗ്രമായ ഗവേഷണ പദ്ധതിക്ക് തുടക്കമായി. പരിസ്ഥിതി കാലാവസ്ഥാ വ്യതിയാന മന്ത്രാലയത്തിന് കീഴിലുള്ള വൈൽഡ് ലൈഫ് ഡെവലപ്മെന്റ് ഡിപ്പാർട്ട്മെന്റാണ് ഈ പദ്ധതി ആരംഭിച്ചത്.പദ്ധതിയുടെ ഒന്നാം ഘട്ടത്തിന്റെ ഭാഗമായി വിദഗ്ധരും സ്പെഷ്യലിസ്റ്റുകളും ഉൾപ്പെട്ട സംഘം സൈറ്റിൽ വിപുലമായ ഫീൽഡ് ക്യാമ്പയിൻ നടത്തി. പ്രദേശം വൃത്തിയാക്കുന്നതിനൊപ്പം, വരാനിരിക്കുന്ന ഗവേഷണ ഘട്ടത്തിന് ആവശ്യമായ അടിസ്ഥാന വിവരങ്ങൾ ശേഖരിക്കുന്നതിനായി ഇവിടുത്തെ സസ്യജാലങ്ങളുടെ കണക്കെടുപ്പും സംഘം പൂർത്തിയാക്കി.രാജ്യത്തെ തോട്ടങ്ങളിലെയും പുൽമേടുകളിലെയും (Meadows) പാരിസ്ഥിതിക വ്യവസ്ഥയെക്കുറിച്ചുള്ള ശാസ്ത്രീയമായ അറിവ് വർദ്ധിപ്പിക്കുന്നതിലേക്കുള്ള നിർണ്ണായക ചുവടുവെപ്പാണിതെന്ന് വൈൽഡ് ലൈഫ് ഡെവലപ്മെന്റ് ഡിപ്പാർട്ട്മെന്റ് തലവൻ ആദിൽ മുഹമ്മദ് അൽ യാഫി പറഞ്ഞു. സസ്യജാലങ്ങളുടെ അവസ്ഥ വിലയിരുത്തുക, പ്രാദേശിക വർഗ്ഗങ്ങളെ തിരിച്ചറിയുക, ഈ പ്രദേശങ്ങളുടെ പുനരുദ്ധാരണത്തിനും സംരക്ഷണത്തിനുമായി ഫലപ്രദമായ പദ്ധതികൾ ആവിഷ്കരിക്കുക എന്നിവയാണ് പ്രധാന ലക്ഷ്യങ്ങൾ.
പരിസ്ഥിതി സുസ്ഥിരതയുമായി ബന്ധപ്പെട്ട ഖത്തർ നാഷണൽ വിഷൻ 2030-ന്റെ ലക്ഷ്യങ്ങൾക്ക് അനുസൃതമായി ശാസ്ത്രീയവും പ്രായോഗികവുമായ പ്രവർത്തനങ്ങൾ ഏകോപിപ്പിച്ചുകൊണ്ട് മന്ത്രാലയം മുന്നോട്ട് പോകുമെന്നും അദ്ദേഹം കൂട്ടിച്ചേർത്തു.
