ദോഹ: ആവശ്യമായ അനുമതി നേടാതെയും ക്യാമ്പിംഗ് ചട്ടങ്ങളും നിയമങ്ങളും ലംഘിച്ചും സ്ഥാപിച്ചിരുന്ന ഒരു ക്യാമ്പ് പരിസ്ഥിതി–കാലാവസ്ഥാ മന്ത്രാലയം നീക്കം ചെയ്തു. വന്യപരിസ്ഥിതി സംരക്ഷണവും പൊതുസുരക്ഷയും ഉറപ്പാക്കുന്നതിന്റെ ഭാഗമായാണ് നടപടി സ്വീകരിച്ചതെന്ന് മന്ത്രാലയം അറിയിച്ചു.
നിലവിലെ ക്യാമ്പിംഗ് സീസണിന്റെ ഭാഗമായി മന്ത്രാലയം നടത്തിവരുന്ന ഫീൽഡ് പരിശോധനയും നിരീക്ഷണ ക്യാമ്പയിനുകളും തുടരുമെന്നും, അനുമതിയില്ലാത്തതും നിയമലംഘനങ്ങൾ നടത്തുന്നവയുമായ എല്ലാ ക്യാമ്പുകളും നീക്കം ചെയ്യുമെന്നും അധികൃതർ വ്യക്തമാക്കി.
അംഗീകരിച്ച മാനദണ്ഡങ്ങളും ചട്ടങ്ങളും ക്യാമ്പർമാർ കൃത്യമായി പാലിക്കുന്നുണ്ടെന്ന് ഉറപ്പാക്കുന്നതിനാണ് ഇത്തരം പരിശോധനകൾ നടത്തുന്നതെന്ന് മന്ത്രാലയം അറിയിച്ചു. ഇതിലൂടെ പരിസ്ഥിതി സംരക്ഷണത്തിനൊപ്പം പൊതുസുരക്ഷയും ഉറപ്പാക്കാനാകുമെന്ന് മന്ത്രാലയം വിലയിരുത്തി.
ക്യാമ്പുകൾ സ്ഥാപിക്കുന്നതിന് മുൻപ് ആവശ്യമായ എല്ലാ അനുമതികളും നിർബന്ധമായും നേടണമെന്ന് മന്ത്രാലയം വീണ്ടും ഓർമിപ്പിച്ചു. നിലവിലുള്ള നിയമങ്ങളും ചട്ടങ്ങളും ലംഘിക്കുന്നവർക്ക് നിയമനടപടികൾ നേരിടേണ്ടിവരുമെന്നും മുന്നറിയിപ്പ് നൽകി.
