ദോഹ:ഖത്തറിലെ ഫാക്ടറികൾക്ക് ഗൾഫ് നാഷണൽ പ്രോഡക്റ്റ് സർട്ടിഫിക്കറ്റ് നൽകുന്നതിനുള്ള സേവനവുമായി ബന്ധപ്പെട്ട പുതിയ മാർഗനിർദേശങ്ങൾ വാണിജ്യ-വ്യവസായ മന്ത്രാലയം പുറത്തിറക്കി. അപേക്ഷാ മാനദണ്ഡങ്ങൾ, രജിസ്ട്രേഷൻ നടപടികൾ, ഇൻഡസ്ട്രി സർവീസസ് പോർട്ടൽ വഴി അപേക്ഷകൾ പരിശോധിച്ച് അംഗീകരിക്കുന്ന പ്രക്രിയ എന്നിവ വ്യക്തതയോടെ വിശദീകരിക്കുകയാണ് മാർഗനിർദേശത്തിന്റെ ലക്ഷ്യം.
അപേക്ഷാ നടപടികൾ ലളിതമാക്കുക, സാങ്കേതിക മാനദണ്ഡങ്ങളും ആവശ്യകതകളും വ്യക്തമാക്കുക, സാമ്പത്തിക-സാങ്കേതിക റിപ്പോർട്ടുകൾ തയ്യാറാക്കുന്നതിൽ അംഗീകൃത അക്കൗണ്ടിംഗ് ഓഫീസുകളുടെ പങ്ക് വിശദീകരിക്കുക എന്നിവയും ഗൈഡിന്റെ പ്രധാന ലക്ഷ്യങ്ങളാണ്. ഇതിലൂടെ ആവശ്യമായ റിപ്പോർട്ടുകളുടെ ഗുണനിലവാരവും കൃത്യതയും വർധിപ്പിക്കുകയും അപേക്ഷകൾ പിഴവില്ലാതെ പൂർത്തിയാക്കുകയും ചെയ്യാനാണ് ഉദ്ദേശിക്കുന്നത്.അടിസ്ഥാന അപേക്ഷാ യോഗ്യതകൾ, രജിസ്ട്രേഷൻ ഘട്ടങ്ങൾ, രേഖകൾ സമർപ്പിക്കുന്ന വിധം, അപേക്ഷകൾ പരിശോധിച്ച് അംഗീകരിക്കുന്ന സംവിധാനം, സാമ്പത്തിക-സാങ്കേതിക റിപ്പോർട്ടുകൾ തയ്യാറാക്കുന്ന ഘട്ടങ്ങൾ തുടങ്ങിയവയെല്ലാം മാർഗനിർദേശത്തിൽ ഉൾപ്പെടുത്തിയിട്ടുണ്ട്.
