ദോഹ: അന്താരാഷ്ട്ര ആണവോർജ്ജ ഏജൻസി (IAEA) ഗവർണേഴ്‌സ് ബോർഡിന്റെയോഗത്തിൽ ഇസ്രായേലിന്റെ വഞ്ചനാപരമായ ആക്രമണത്തെ ഖത്തർ ശക്തമായി അപലപിച്ചു. തങ്ങളുടെ പരമാധികാരവും പ്രദേശിക സമഗ്രതയും സംരക്ഷിക്കാൻ ആവശ്യമായ എല്ലാ നടപടികളും സ്വീകരിക്കുമെന്ന് ഖത്തർ വ്യക്തമാക്കി.
വിയന്നയിൽ നടന്ന അന്താരാഷ്ട്ര ആണവോർജ്ജ ഏജൻസി (IAEA) ഗവർണേഴ്‌സ് ബോർഡിന്റെ സെഷനിൽ ഖത്തറിന്റെ സ്ഥിരം പ്രതിനിധി ജാസിം യാക്കൂബ് അൽ-ഹമ്മദിയാണ് ശക്തമായ പ്രതിഷേധം രേഖപെടുത്തിയത്.
ഖത്തർ-ഈജിപ്ത്-യുഎസ് മധ്യസ്ഥ ശ്രമങ്ങൾ നടന്നു കൊണ്ടിരിക്കുമ്പോഴാണ് ഇസ്രായേൽ ആക്രമണം നടത്തിയതെന്ന് അദ്ദേഹം ചൂണ്ടിക്കാട്ടി. നെതന്യാഹുവിനെ ആക്രമണത്തിന് ഉത്തരവാദിയാക്കുമെന്ന് ഖത്തർ വ്യക്തമാക്കി.
രാജ്യങ്ങളും അന്താരാഷ്ട്ര സംഘടനകളും നൽകിയ വേഗത്തിലുള്ള അപലപനത്തിനും ഐക്യദാർഢ്യത്തിനും ഖത്തർ നന്ദി അറിയിച്ചു. ഇസ്രായേലിന്റെ ആണവ ശേഷി മേഖലാ-ലോക സുരക്ഷയ്ക്ക് ഭീഷണിയാണെന്നും, ആണവ സൗകര്യങ്ങൾ IAEA നിയന്ത്രണത്തിൽ കൊണ്ടുവരണമെന്നും ഖത്തർ ആവർത്തിച്ചു.
