ദോഹ:മിഡിൽ ഈസ്റ്റിൽ രൂക്ഷമാകുന്ന സംഘർഷങ്ങൾ ഊർജ്ജ പ്രതിസന്ധിക്കും വിപണിയിലെ അസ്ഥിരതയ്ക്കും കാരണമാകുന്നതിലൂടെ ഇന്ത്യൻ സമ്പദ്‌വ്യവസ്ഥയിൽ കടുത്ത സമ്മർദ്ദം ചെലുത്തുമെന്ന് സാമ്പത്തിക വിശകലന സ്ഥാപനമായ എംകെ വെൽത്ത് മാനേജ്‌മെന്റ് മുന്നറിയിപ്പ് നൽകി. ഇന്ധനവിലയിലുണ്ടാകുന്ന വർധനവും വിതരണ ശൃംഖലയിലെ തടസ്സങ്ങളും ഇന്ത്യയുടെ ജി.ഡി.പി (GDP) വളർച്ചയെ താഴേക്ക് വലിച്ചേക്കാമെന്ന് റിപ്പോർട്ട് ചൂണ്ടിക്കാട്ടുന്നു.യുദ്ധം ആരംഭിച്ചതോടെ അന്താരാഷ്ട്ര വിപണിയിൽ ബ്രെന്റ് ക്രൂഡ് ഓയിൽ വില ബാരലിന് 65-70 ഡോളർ എന്ന നിലയിൽ നിന്ന് 110 ഡോളറിലേക്ക് ഉയർന്നു. ഇറാന്റെ എണ്ണ ഉൽപ്പാദന കേന്ദ്രങ്ങൾക്കുണ്ടായ നാശനഷ്ടങ്ങളും ഇതിന് ആക്കം കൂട്ടി.തന്ത്രപ്രധാനമായ ഹോർമുസ് കടലിടുക്ക് അടച്ചതും ഖത്തറിൽ നിന്നുള്ള എൽ.എൻ.ജി (LNG) വിതരണം നിലച്ചതും ഊർജ്ജ വിപണിയെ സാരമായി ബാധിച്ചു. പ്രകൃതിവാതക വിലയിൽ 50 ശതമാനത്തോളം വർധനവാണ് രേഖപ്പെടുത്തിയത്.എണ്ണവിലയിലുണ്ടാകുന്ന ഓരോ 10 ശതമാനം വർധനവും ഇന്ത്യയുടെ ജി.ഡി.പി വളർച്ചയിൽ 0.25 ശതമാനത്തിന്റെ കുറവുണ്ടാക്കാം. നിലവിൽ 7 ശതമാനം വളർച്ച പ്രതീക്ഷിക്കുന്ന ഇന്ത്യൻ സമ്പദ്‌വ്യവസ്ഥ, ഇത്തരം ബാഹ്യ ഇടപെടലുകൾ മൂലം 6.50 ശതമാനത്തിലേക്ക് ചുരുങ്ങാൻ സാധ്യതയുണ്ട്.യുദ്ധസാഹചര്യങ്ങളിൽ ഇന്ത്യൻ രൂപയുടെ മൂല്യം ഇടിയുന്നത് ഇറക്കുമതി ചെലവ് വർധിപ്പിക്കും. പ്രത്യേകിച്ച് ഇലക്ട്രോണിക്സ്, ആഭരണങ്ങൾ എന്നിവയുടെ വില ഉയരാൻ ഇത് കാരണമാകും. ഉയർന്ന ക്രൂഡ് ഓയിൽ വിലയും ഇറക്കുമതി ചെലവും പണപ്പെരുപ്പത്തിന് (Inflation) വഴിതെളിക്കുമെന്നും ഇത് ഫണ്ടുകളുടെ ലഭ്യതയെയും മാർക്കറ്റ് യീൽഡിനെയും ബാധിക്കുമെന്നും റിപ്പോർട്ട് വ്യക്തമാക്കുന്നു.2026-ഓടെ എൽ.എൻ.ജി ഉൽപ്പാദനത്തിൽ 3.30 ദശലക്ഷം ടൺ മുതൽ 11.20 ദശലക്ഷം ടൺ വരെ കുറവുണ്ടാകാൻ സാധ്യതയുണ്ട്. എങ്കിലും, ഇത്തരം വെല്ലുവിളികൾക്കിടയിലും ഇന്ത്യൻ സമ്പദ്‌വ്യവസ്ഥ പ്രതിരോധശേഷി നിലനിർത്തുന്നുണ്ടെന്നും എംകെ വെൽത്ത് മാനേജ്‌മെന്റ് റിപ്പോർട്ട് നിരീക്ഷിക്കുന്നു.