ആർട്ടിഫിഷ്യൽ ഇന്റലിജൻസ് (എഐ) മേഖലയിൽ വൻതോതിൽ നിക്ഷേപം തുടരുന്നതിനിടെ ജീവനക്കാരുടെ പുനഃസംഘടനയുടെ ഭാഗമായി സ്വയം വിരമിക്കൽ പദ്ധതി പ്രഖ്യാപിച്ച് മൈക്രോസോഫ്റ്റ്. ഇന്ത്യ, അമേരിക്ക, യുകെ, കാനഡ തുടങ്ങിയ രാജ്യങ്ങളിലെ അർഹരായ ഏകദേശം 60,000 ജീവനക്കാർക്ക് പദ്ധതിയുടെ ആനുകൂല്യം ലഭിക്കുമെന്നാണ് റിപ്പോർട്ടുകൾ.

ലെവൽ 70-ലോ അതിനു താഴെയോ ഉള്ള ജീവനക്കാർക്കാണ് പദ്ധതിയിൽ പങ്കെടുക്കാൻ അവസരം. ജനറൽ മാനേജർമാർ, പാർട്ണർമാർ, സീനിയർ ഡയറക്ടർമാർ, വൈസ് പ്രസിഡന്റുമാർ തുടങ്ങിയ മുതിർന്ന തസ്തികകളിലുള്ളവരും അർഹതാ മാനദണ്ഡങ്ങൾ പാലിക്കുന്നുണ്ടെങ്കിൽ പദ്ധതിയുടെ പരിധിയിൽ വരും. സ്വയം വിരമിക്കൽ തിരഞ്ഞെടുക്കാൻ താൽപര്യമുള്ളവർ ഡിസംബർ ആദ്യത്തോടെ തീരുമാനം അറിയിക്കണം. പദ്ധതി സ്വീകരിക്കുന്നവർക്ക് ഡിസംബർ 31-ന് കമ്പനിയിൽനിന്ന് വിരമിക്കാം.

എഐ ഡാറ്റാ സെന്ററുകൾക്കും അനുബന്ധ സാങ്കേതിക അടിസ്ഥാനസൗകര്യങ്ങൾക്കുമായി കോടിക്കണക്കിന് ഡോളർ നിക്ഷേപിക്കുന്ന മൈക്രോസോഫ്റ്റ്, ചെലവുകൾ നിയന്ത്രിക്കുന്നതിനും സാമ്പത്തിക അച്ചടക്കം ഉറപ്പാക്കുന്നതിനുമുള്ള നടപടികളുടെ ഭാഗമായാണ് ഈ പദ്ധതി നടപ്പാക്കുന്നത്. നിർബന്ധിത കൂട്ടപ്പിരിച്ചുവിടലുകൾക്ക് പകരം സാമ്പത്തിക ആനുകൂല്യങ്ങളോടെ കമ്പനിയിൽനിന്ന് പിരിയാൻ താൽപര്യമുള്ളവർക്ക് അവസരം നൽകുകയാണ് ലക്ഷ്യം.

അതേസമയം, കമ്പനിയിലെ എല്ലാ വിഭാഗങ്ങൾക്കും പദ്ധതി ബാധകമാകില്ല. മാർക്കറ്റിംഗ്, സെയിൽസ്, എൻജിനീയറിങ് വിഭാഗങ്ങളിലെ ചില ടീമുകളെ പദ്ധതിയിൽനിന്ന് ഒഴിവാക്കിയിട്ടുണ്ട്. എഐ രംഗത്തെ വൻതോതിലുള്ള നിക്ഷേപങ്ങൾക്കൊപ്പം പ്രവർത്തനച്ചെലവ് ക്രമീകരിക്കാനുള്ള മൈക്രോസോഫ്റ്റിന്റെ നീക്കമായാണ് ഈ തീരുമാനം വിലയിരുത്തപ്പെടുന്നത്.