ദോഹ: ഇന്ത്യൻ സിനിമയിലെ ഇതിഹാസ താരം മോഹൻലാലിന്റെ ജന്മദിനത്തോടനുബന്ധിച്ച് ഐ.സി.സി പ്രതിവാര കലാവിരുന്നായ വെനസ്ഡേ ഫിയസ്റ്റയിൽ 'ലാലിസം' (Lalism) എന്ന പേരിൽ മെഗാ സാംസ്കാരിക വിരുന്ന് സംഘടിപ്പിക്കുന്നു. എം.എഫ്.സി.ഡബ്ല്യു.എ ക്യു (MFCWAQ), ഇന്ത്യൻ കൾച്ചറൽ സെന്ററുമായി (ICC) സഹകരിച്ചാണ് ഈ പ്രൗഢഗംഭീരമായ പരിപാടി ഒരുക്കുന്നത്.മെയ് 13 ബുധനാഴ്ച വൈകുന്നേരം 6:30-ന് ഐ.സി.സി അശോക ഹാളിലാണ് ആഘോഷങ്ങൾ നടക്കുക. മലയാളികളുടെ പ്രിയതാരം വെള്ളിത്തിരയിൽ അനശ്വരമാക്കിയ കഥാപാത്രങ്ങളെയും ഗാനങ്ങളെയും കോർത്തിണക്കി ഒരുക്കുന്ന ദൃശ്യ-ശ്രാവ്യ വിരുന്നാണ് പരിപാടിയുടെ പ്രധാന ആകർഷണം.ലാൽ ചിത്രങ്ങളിലെ നിത്യഹരിത ഗാനങ്ങൾ കോർത്തിണക്കിയ തത്സമയ സംഗീത നിശയും മോഹൻലാലിന്റെ ഐക്കോണിക് നൃത്തചുവടുകൾ പുനരാവിഷ്കരിക്കുന്ന നൃത്ത പ്രകടനങ്ങളും ലാലേട്ടന്റെ അഭിനയ ജീവിതത്തിലെ നാഴികക്കല്ലുകളായ സിനിമകളുടെയും രംഗങ്ങളുടെയും പ്രത്യേക ദൃശ്യാവിഷ്കാരങ്ങളും അരങ്ങേറും.കലാ-സാംസ്കാരിക രംഗത്തെ പ്രമുഖരും ചലച്ചിത്ര പ്രേമികളും പങ്കെടുക്കുന്ന ഈ വൈകുന്നേരം, മോഹൻലാൽ എന്ന നടൻ ഇന്ത്യൻ സിനിമയ്ക്ക് നൽകിയ അതുല്യമായ സംഭാവനകളെ ആദരിക്കാനുള്ള വേദിയായി മാറും. പ്രവാസി മലയാളി സമൂഹത്തിന് ഗൃഹാതുരത്വവും ആവേശവും പകരുന്ന ഈ ആഘോഷത്തിലേക്ക് മുഴുവൻ സിനിമാ പ്രേമികളെയും സ്വാഗതം ചെയ്യുന്നതായി സംഘാടകർ അറിയിച്ചു.
