ദോഹ: അന്താരാഷ്ട്ര ക്രിക്കറ്റ് വേദികളിൽ ഖത്തറിനെ പ്രതിനിധീകരിക്കാൻ എം.ഇ.എസ് ഇന്ത്യൻ സ്കൂളിലെ മൂന്ന് വിദ്യാർത്ഥിനികൾക്ക് സുവർണ്ണാവസരം. സ്കൂളിലെ പതിനൊന്നാം ക്ലാസ് വിദ്യാർത്ഥിനികളായ മെഹ്സ മെഹ്വിഷ്, ക്രിസ്റ്റീന ജേക്കബ്, ജസ മറിയം എന്നിവരാണ് ഖത്തർ ക്രിക്കറ്റ് അസോസിയേഷന്റെ (QCA) ദേശീയ ടീമിലേക്ക് തിരഞ്ഞെടുക്കപ്പെട്ടത്. മികച്ച കായികക്ഷമതയും കഠിനാധ്വാനവും വഴി സ്കൂളിന്റെ കായിക ചരിത്രത്തിൽ പുതിയൊരു അധ്യായം കുറിച്ചിരിക്കുകയാണ് ഈ മിടുക്കികൾ.
വരുന്ന ജൂലൈ 21 മുതൽ 30 വരെ മലേഷ്യയിൽ വെച്ച് നടക്കുന്ന 'ഐസിസി അണ്ടർ-19 വനിതാ ലോകകപ്പ് യോഗ്യതാ മത്സരങ്ങളിൽ' (ICC Under-19 Women’s World Cup Qualifiers) മൂവരും ഖത്തറിനായി പാഡണിയും.
ഇതിനുപുറമേ, മലേഷ്യയിൽ തന്നെ ജൂലൈ 9 മുതൽ 19 വരെ നടക്കുന്ന 'എസിസി അണ്ടർ-19 വനിതാ പ്രീമിയർ കപ്പിലും' (ACC Under-19 Women’s Premier Cup 2026) കളിക്കാൻ മെഹ്സ മെഹ്വിഷും ജസ മറിയവും യോഗ്യത നേടിയിട്ടുണ്ട്.
തങ്ങളുടെ കരിയറിലെ ഈ വലിയ നേട്ടം കഠിനമായ പരിശീലനത്തിന്റെയും ക്രിക്കറ്റിനോടുള്ള അചഞ്ചലമായ പ്രതിബദ്ധതയുടെയും ഫലമാണെന്ന് ഈ യുവപ്രതിഭകൾ തെളിയിച്ചു.
അന്താരാഷ്ട്ര തലത്തിൽ രാജ്യത്തിന്റെ പെരുമ ഉയർത്താൻ പോകുന്ന കായികതാരങ്ങളെ സ്കൂൾ മാനേജ്‌മെന്റും പ്രിൻസിപ്പൽ ഡോ. ഹമീദ ഖാദറും ചേർന്ന് ഹൃദയപൂർവ്വം അഭിനന്ദിക്കുകയും, വരാനിരിക്കുന്ന ടൂർണമെന്റുകളിൽ മികച്ച വിജയം കൈവരിക്കാൻ എല്ലാവിധ ആശംസകളും നേരുകയും ചെയ്തു.
