വർക്കല: ലഹരിക്കേസിൽ ഭാര്യ അറസ്റ്റിലായി രണ്ടാഴ്ചയ്ക്കുശേഷം എംഡിഎംഎ വിൽപ്പന നടത്തിയിരുന്ന ഭർത്താവും പൊലീസ് പിടിയിലായി. വർക്കല മുത്താന സ്വദേശി അൻസർ (31) ആണ് ഡാൻസാഫ് സംഘത്തിന്റെ പിടിയിലായത്.
കല്ലമ്പലത്ത് ലഹരിക്കേസിൽ അറസ്റ്റിലായി റിമാൻഡിൽ കഴിയുന്ന തസ്ലീന, മുഹമ്മദ് ഷാൻ, അയിരൂർ കേസിൽ അറസ്റ്റിലായ സതീഷ് എന്നിവർക്കായി വൻതോതിൽ എംഡിഎംഎ എത്തിച്ചിരുന്നത് അൻസറാണെന്നാണ് പൊലീസിന്റെ കണ്ടെത്തൽ.
രണ്ടാഴ്ച മുമ്പ് നീറുവിളയിൽ വാടകയ്ക്കെടുത്ത വീട്ടിൽ ഡാൻസാഫ് സംഘം നടത്തിയ പരിശോധനയിലാണ് അഞ്ച് ഗ്രാം എംഡിഎംഎയുമായി തസ്ലീന പിടിയിലായത്. ലഹരിക്കച്ചവടത്തിനായി വീട് വാടകയ്ക്കെടുത്ത ശേഷം അവിടെനിന്ന് ഇടപാടുകാരെ കണ്ടെത്തുകയായിരുന്നു എന്നാണ് പൊലീസ് പറയുന്നത്.
തസ്ലീന അറസ്റ്റിലായതിന് പിന്നാലെ അൻസർ മൊബൈൽ ഫോൺ സ്വിച്ച് ഓഫ് ചെയ്ത് ഒളിവിൽ പോയിരുന്നു. അൻസർ നാട്ടിൽ തിരിച്ചെത്തിയതായി ലഭിച്ച രഹസ്യവിവരത്തിന്റെ അടിസ്ഥാനത്തിൽ നടത്തിയ പരിശോധനയിലാണ് ഇയാൾ പിടിയിലായത്.
