തൃശൂർ: ജില്ലയിലെ മറ്റത്തൂരിൽ നടന്ന തദ്ദേശഭരണ സ്ഥാപനത്തിലെ പ്രസിഡന്റ് തിരഞ്ഞെടുപ്പിനിടെ നാടകീയ നീക്കങ്ങൾ. പ്രസിഡന്റ് തെരഞ്ഞെടുപ്പിൽ ഇടതുമുന്നണിക്കെതിരെ കോൺ​​ഗ്രസ് - ബിജെപി അം​ഗങ്ങൾ ഒന്നിച്ചു. ഇതോടെ സ്വതന്ത്ര അംഗമായ ടെസി ജോസ് പ്രസിഡന്റാകുകയും ചെയ്തു. തിരഞ്ഞെടുപ്പിന് തൊട്ടുമുൻപുണ്ടായ അപ്രതീക്ഷിത നീക്കങ്ങളാണ് ഫലം പൂർണമായി മറിച്ചുവിട്ടത്.

പ്രസിഡന്റ് തിരഞ്ഞെടുപ്പ് നടക്കാനിരിക്കെ കോൺഗ്രസിലെ എട്ട് അംഗങ്ങൾ ഒരുമിച്ച് പാർട്ടി വിട്ടു. ഡിസിസി അധ്യക്ഷന് രാജിക്കത്ത് കൈമാറിയ ഇവർ പിന്നീട് ബിജെപിയുമായി ചേർന്ന് സ്വതന്ത്ര അംഗമായ ടെസി ജോസിനെ പ്രസിഡന്റ് സ്ഥാനത്തേക്ക് വിജയിപ്പിച്ചു. ഉത്തരേന്ത്യൻ സംസ്ഥാനങ്ങളിൽ ബിജെപി നടപ്പാക്കിയ ‘ഓപ്പറേഷൻ കമൽ’ മാതൃകയോട് സാമ്യമുള്ള രാഷ്ട്രീയ നീക്കമായാണ് ഈ സംഭവത്തെ വിലയിരുത്തുന്നത്.

24 അംഗങ്ങളുള്ള മറ്റത്തൂർ പഞ്ചായത്തിൽ എൽഡിഎഫ് ആയിരുന്നു ഏറ്റവും വലിയ ഒറ്റകക്ഷി. 10 സീറ്റുകളാണ് എൽഡിഎഫിന് ലഭിച്ചത്. കോൺഗ്രസിന് എട്ട്, ബിജെപിക്ക് നാല് സീറ്റുകൾ, രണ്ട് സ്വതന്ത്ര അംഗങ്ങൾ എന്നിങ്ങനെയായിരുന്നു കക്ഷിനില. സ്വതന്ത്രരായി വിജയിച്ചത് കോൺഗ്രസ് വിമതരായിരുന്നു. രാവിലെ നടന്ന നാടകീയ സംഭവങ്ങൾക്കുശേഷം രാജിവച്ച എട്ട് കോൺഗ്രസ് അംഗങ്ങളും ടെസി ജോസിന് പിന്തുണ പ്രഖ്യാപിച്ചു. ബിജെപിയും ഇതേ പിന്തുണ നൽകി. എന്നാൽ ഒരു ബിജെപി അംഗത്തിന്റെ വോട്ട് അസാധുവായതും ശ്രദ്ധേയമായി.

ഈ രാഷ്ട്രീയ മറിവിന് പിന്നിലെ കാരണം കോൺഗ്രസ് വിമതരെ പാർട്ടിയിൽ തിരിച്ചെടുക്കാനുള്ള നീക്കങ്ങളോടുള്ള അസംതൃപ്തിയാണെന്ന് രാജിവച്ച അംഗങ്ങൾ വ്യക്തമാക്കി. എൽഡിഎഫിനെ അധികാരത്തിൽ നിന്ന് അകറ്റി നിർത്തുക എന്ന ലക്ഷ്യത്തോടെ ബിജെപിയുമായി ചേർന്നാണ് തന്ത്രപരമായ നീക്കം നടത്തിയതെന്നാണ് രാഷ്ട്രീയ വിലയിരുത്തൽ.

അതേസമയം കോൺഗ്രസ് വിമതനായി മത്സരിച്ച് വിജയിച്ച ഔസേപ്പിനെ എൽഡിഎഫ് പ്രസിഡന്റ് സ്ഥാനാർഥിയായി മുന്നോട്ടുവച്ചതും ഈ നീക്കത്തിന് കാരണമായതായി പറയുന്നു. ഇതിനെ തടയാനായിരുന്നു കോൺഗ്രസ് അംഗങ്ങളുടെ ബിജെപി പിന്തുണയെന്നും വിലയിരുത്തപ്പെടുന്നു.

കോൺഗ്രസ്–ബിജെപി കൂട്ടുകെട്ടിനെതിരെ പ്രതിഷേധിച്ച് കോൺഗ്രസ് പ്രവർത്തകർ മറ്റത്തൂരിൽ പ്രകടനം നടത്തി. സംഭവം പ്രാദേശിക ഭരണരംഗത്ത് മാത്രമല്ല, സംസ്ഥാനതല രാഷ്ട്രീയത്തിലും വലിയ പ്രതികരണങ്ങൾ സൃഷ്ടിച്ചിട്ടുണ്ട്.