കൊച്ചി: മാസപ്പടി കേസിൽ മുൻ മുഖ്യമന്ത്രി പിണറായി വിജയൻ, മകൾ വീണ വിജയൻ, മുൻ മന്ത്രി മുഹമ്മദ് റിയാസ് എന്നിവരെ ചുറ്റിപ്പറ്റിയുള്ള അന്വേഷണത്തിൽ പ്രത്യേക അന്വേഷണസംഘമായ എസ്ഐടി നടപടികൾ ആരംഭിച്ചു. അന്വേഷണത്തിന്റെ ഭാഗമായി മുഹമ്മദ് റിയാസിന്റെ സുഹൃത്തുക്കളായ ഹസൻ വാരിസ്, നിഖിൽ എന്നിവർക്കാണ് എസ്ഐടി നോട്ടീസ് നൽകിയത്. ഇരുവരെയും ആദ്യഘട്ടത്തിൽ ചോദ്യം ചെയ്യുമെന്നാണ് വിവരം.
മാസപ്പടി കേസിൽ പിണറായി വിജയൻ, വീണ വിജയൻ, മുഹമ്മദ് റിയാസ് എന്നിവർക്കെതിരെ അഴിമതി നിരോധന നിയമപ്രകാരം കേസ് രജിസ്റ്റർ ചെയ്യണമെന്ന ശുപാർശ എൻഫോഴ്സ്മെന്റ് ഡയറക്ടറേറ്റ് (ഇഡി) മുന്നോട്ടുവച്ചിരുന്നു. ഇതിന്റെ തുടർനടപടികളുടെ ഭാഗമായാണ് എസ്ഐടി അന്വേഷണം ശക്തമാക്കുന്നത്.
ഹവാല ഇടപാടുകളുമായി ബന്ധപ്പെട്ട ആരോപണങ്ങളിലാകും എസ്ഐടി പ്രാഥമികമായി ശ്രദ്ധ കേന്ദ്രീകരിക്കുക. ഇഡി കൈമാറിയ രേഖകളും മറ്റ് തെളിവുകളും വിശദമായി പരിശോധിച്ച ശേഷമായിരിക്കും തുടർനടപടികളിലേക്ക് കടക്കുക. ഹവാല ഇടപാടുകൾക്ക് പുറമെ സാമ്പത്തിക ഇടപാടുകളുമായി ബന്ധപ്പെട്ട മറ്റ് വിവരങ്ങളും അന്വേഷണസംഘം പരിശോധിക്കും.
അന്വേഷണത്തിന്റെ വിവിധ ഘട്ടങ്ങളിൽ നിയമവിദഗ്ധരുമായി കൂടിയാലോചിച്ച ശേഷമായിരിക്കും കേസ് രജിസ്റ്റർ ചെയ്യുന്നതുൾപ്പെടെയുള്ള കാര്യങ്ങളിൽ അന്തിമ തീരുമാനമെടുക്കുക. അനധികൃത സ്വത്ത് സമ്പാദനവുമായി ബന്ധപ്പെട്ട് പ്രത്യേക വിജിലൻസ് കേസ് രജിസ്റ്റർ ചെയ്ത് അന്വേഷണം നടത്തണമോ എന്നതും എസ്ഐടി പരിഗണിക്കുന്നുണ്ട്.
മുൻ മുഖ്യമന്ത്രിയും നിലവിലെ പ്രതിപക്ഷ നേതാവുമായ പിണറായി വിജയനെ ഉൾപ്പെടുത്തി നടക്കുന്ന അന്വേഷണമായതിനാൽ എസ്ഐടിയുടെ ഓരോ നീക്കവും സംസ്ഥാന രാഷ്ട്രീയത്തിൽ നിർണായകമാകുമെന്നാണ് വിലയിരുത്തൽ.
