ജ്യോതിഷത്തിൽ ശക്തിയുടെയും ധൈര്യത്തിന്റെയും പ്രതീകമായാണ് ചൊവ്വയെ കണക്കാക്കുന്നത്. വേദജ്യോതിഷ പ്രകാരം ഗ്രഹങ്ങളുടെ സേനാപതിയായ ചൊവ്വ ഊർജം, സാഹസികത, ധീരത, ഭൂമി, സാമ്പത്തിക പ്രവർത്തനങ്ങൾ തുടങ്ങിയവയെ സ്വാധീനിക്കുന്ന ഗ്രഹമാണ്. ചൊവ്വയുടെ രാശിമാറ്റം ഓരോ രാശിയിലും വ്യത്യസ്തമായ ഫലങ്ങളാണ് സൃഷ്ടിക്കുകയെന്നാണ് ജ്യോതിഷ വിശ്വാസം.

നിലവിൽ ചൊവ്വ കർക്കടക രാശിയിലാണ് സഞ്ചരിക്കുന്നത്. നവംബർ 12 വരെ ചൊവ്വ കർക്കടകത്തിൽ തുടരും. ഈ കാലയളവിൽ ചില രാശിക്കാർക്ക് സാമ്പത്തികമായും തൊഴിൽപരമായും നേട്ടങ്ങൾ ലഭിക്കാനുള്ള സാധ്യതയുണ്ടെന്നാണ് ജ്യോതിഷ പ്രവചനം. പ്രത്യേകിച്ച് നാല് രാശികൾക്ക് ഈ സംക്രമണം ഏറെ അനുകൂലമായേക്കും.

ഇടവം: ചൊവ്വയുടെ കർക്കടക സംക്രമണം ഇടവം രാശിക്കാർക്ക് സാമ്പത്തികമായി നേട്ടങ്ങൾ കൊണ്ടുവരാൻ സാധ്യതയുള്ള സമയമാണ്. വരുമാനം വർധിക്കാനും സാമ്പത്തിക പ്രതിസന്ധികൾക്ക് പരിഹാരം കാണാനും സാധിച്ചേക്കാം. ഏറെക്കാലമായി മുടങ്ങിക്കിടക്കുന്ന സാമ്പത്തിക കാര്യങ്ങളിൽ പുരോഗതിയുണ്ടാകാനും സാധ്യതയുണ്ട്. ജോലിയിൽ സ്ഥാനക്കയറ്റത്തിനും പുതിയ അവസരങ്ങൾ ലഭിക്കാനും സാധ്യത കാണുന്നു.

കർക്കടകം: സ്വന്തം രാശിയിലേക്കുള്ള ചൊവ്വയുടെ വരവ് കർക്കടകം രാശിക്കാർക്ക് പലവിധ നേട്ടങ്ങൾ നൽകുമെന്നാണ് ജ്യോതിഷ വിശ്വാസം. അപ്രതീക്ഷിത സാമ്പത്തിക നേട്ടങ്ങൾ ലഭിച്ചേക്കാം. നേരത്തെ മറ്റിടങ്ങളിൽ കുടുങ്ങിക്കിടന്ന പണം തിരിച്ചുകിട്ടാനും സാധ്യതയുണ്ട്. വീട്, ഭൂമി, വാഹനം എന്നിവ സ്വന്തമാക്കാനുള്ള ശ്രമങ്ങൾ വിജയത്തിലെത്തിയേക്കാം. മത്സര പരീക്ഷകൾക്ക് തയ്യാറെടുക്കുന്ന വിദ്യാർഥികൾക്കും യുവാക്കൾക്കും ഈ കാലയളവ് അനുകൂലമായിരിക്കാം.

കന്നി: കന്നി രാശിക്കാർക്കും ചൊവ്വയുടെ ഈ സംക്രമണം ഗുണകരമായേക്കാം. പൂർവിക സ്വത്തിൽ നിന്നോ മുൻകാല നിക്ഷേപങ്ങളിൽ നിന്നോ സാമ്പത്തിക നേട്ടം ലഭിക്കാൻ സാധ്യതയുണ്ട്. ബിസിനസ് രംഗത്തുള്ളവർക്ക് പുതിയ അവസരങ്ങൾ ലഭിക്കുകയും പ്രവർത്തനങ്ങളിൽ പുരോഗതിയുണ്ടാകുകയും ചെയ്തേക്കാം. മാനസിക സമ്മർദ്ദം കുറയുന്നതോടെ കുടുംബത്തോടൊപ്പം കൂടുതൽ സമാധാനപരമായ സമയം ചെലവഴിക്കാനും സാധിച്ചേക്കാം.

വൃശ്ചികം: വൃശ്ചികം രാശിക്കാർക്ക് തൊഴിൽ രംഗത്ത് നേട്ടങ്ങൾ നേടാനുള്ള അവസരങ്ങൾ വർധിച്ചേക്കാം. ജോലിസ്ഥലത്ത് പ്രധാനപ്പെട്ട തീരുമാനങ്ങൾ എടുക്കുന്നതിൽ വിജയം കൈവരിക്കാനാകും. സമൂഹത്തിലെ അംഗീകാരവും ബഹുമാനവും വർധിക്കാനുള്ള സാധ്യതയുണ്ട്. മേലുദ്യോഗസ്ഥരുടെ പ്രശംസയും പിന്തുണയും ലഭിച്ചേക്കാം. നേതൃപാടവം അംഗീകരിക്കപ്പെടുകയും അതിന് അനുസരിച്ചുള്ള സ്ഥാനമോ സാമ്പത്തിക നേട്ടമോ ലഭിക്കുകയും ചെയ്യാനുള്ള സാധ്യതയുണ്ട്.