ദോഹ: വിശുദ്ധ റമദാൻ അതിന്റെ അവസാന വാരത്തിലേക്ക് പ്രവേശിച്ചതോടെ, ഈദുൽ ഫിത്തറിനെ വരവേൽക്കാൻ ഖത്തറിലെ ഷോപ്പിംഗ് മാളുകളും ചന്തകളും സജീവമായി. വസ്ത്രങ്ങൾ, സമ്മാനങ്ങൾ, മധുരപലഹാരങ്ങൾ എന്നിവ വാങ്ങാനായി സ്വദേശികളും പ്രവാസികളും ഉൾപ്പെടെയുള്ള വലിയൊരു ജനവിഭാഗമാണ് വിപണികളിലേക്ക് ഒഴുകുന്നത്.പെരുന്നാൾ കോടി വാങ്ങാനായി വസ്ത്ര വ്യാപാര സ്ഥാപനങ്ങളിലും സുഗന്ധദ്രവ്യങ്ങൾ വിൽക്കുന്ന കടകളിലും വൻ തിരക്കാണ് അനുഭവപ്പെടുന്നത്. കുടുംബങ്ങൾ ഒത്തുചേർന്നാണ് ഷോപ്പിംഗിനായി എത്തുന്നത്.ഈദ് ആഘോഷങ്ങളുടെ അവിഭാജ്യ ഘടകമായ ചോക്ലേറ്റുകൾ, ഈന്തപ്പഴം, നട്‌സുകൾ, പരമ്പരാഗത മധുരപലഹാരങ്ങൾ എന്നിവയ്ക്ക് വിപണിയിൽ വൻ ഡിമാന്റാണ്.റമദാൻ-ഈദ് വിപണി ലക്ഷ്യമിട്ട് പ്രമുഖ റീട്ടെയിൽ സ്ഥാപനങ്ങൾ പ്രഖ്യാപിച്ച ആകർഷകമായ ഓഫറുകളും ഡിസ്കൗണ്ടുകളും ഉപഭോക്താക്കളെ മാളുകളിലേക്ക് ആകർഷിക്കുന്നു.നിലവിലെ പ്രത്യേക സാഹചര്യങ്ങൾക്കിടയിലും വിപണിയിൽ ഉൽപ്പന്നങ്ങളുടെ ലഭ്യത ഉറപ്പാക്കാൻ സാധിച്ചിട്ടുണ്ടെന്ന് ഉപഭോക്താക്കൾ പ്രതികരിച്ചു. ഭക്ഷണസാധനങ്ങളും മറ്റ് നിത്യോപയോഗ വസ്തുക്കളും യഥേഷ്ടം ലഭ്യമാണെന്നത് ജനങ്ങൾക്ക് ആശ്വാസം നൽകുന്നു. വിപണിയിൽ വിലക്കയറ്റം നിയന്ത്രിക്കാനും ഉൽപ്പന്നങ്ങളുടെ ഗുണനിലവാരം ഉറപ്പാക്കാനും അധികൃതർ ശക്തമായ നിരീക്ഷണം നടത്തിവരുന്നുണ്ട്.കാലങ്ങളായുള്ള സാമൂഹിക ആചാരങ്ങൾ മുറുകെപ്പിടിച്ചുകൊണ്ടാണ് കുടുംബങ്ങൾ ഈദിനായുള്ള തയ്യാറെടുപ്പുകൾ നടത്തുന്നത്. സമ്മാനങ്ങൾ കൈമാറുന്നതും പലഹാരങ്ങൾ ഒരുക്കുന്നതും ആഘോഷത്തിന് മാറ്റുകൂട്ടുന്നു. മാളുകളിലെ വർണ്ണാഭമായ റമദാൻ അലങ്കാരങ്ങൾ സന്ദർശകർക്ക് ദൃശ്യവിരുന്നും ഉത്സവ പ്രതീതിയും പകരുന്നു.
