ദോഹ: കലയോടും ലക്ഷ്വറി ഫാഷനോടും ഖത്തറിനുള്ള അടങ്ങാത്ത അനുരാഗം മനസ്സിലാക്കി, ഇന്ത്യൻ ഡിസൈൻ മികവിന്റെ പുതിയ വസന്തം ഖത്തറിലെത്തിക്കാനൊരുങ്ങി പ്രമുഖ ബോളിവുഡ് ഡിസൈനർ മനീഷ് മൽഹോത്ര. ഖത്തറുമായുള്ള സർഗ്ഗാത്മക ബന്ധം കൂടുതൽ ആഴത്തിലുള്ളതാക്കാനും ഇന്ത്യൻ കരകൗശല ഭംഗി (Craftsmanship) ദോഹയിലെ ഫാഷൻ പ്രേമികളിലേക്ക് എത്തിക്കാനുമാണ് അദ്ദേഹം ലക്ഷ്യമിടുന്നത്.  
​ദോഹ ജ്വല്ലറി ആൻഡ് വാച്ചസ് എക്സിബിഷനിൽ (DJWE 2026) പങ്കെടുത്തുകൊണ്ട് പ്രാദേശിക പത്രത്തിനു നൽകിയ പ്രത്യേക അഭിമുഖത്തിലാണ് മനീഷ് മൽഹോത്ര തന്റെ പുതിയ പദ്ധതികൾ പങ്കുവെച്ചത്.  DJWE 2026-ൽ 'മനീഷ് മൽഹോത്ര ഹൈ ജ്വല്ലറി' പ്രദർശിപ്പിച്ചതിൽ ഏറ്റവും കൂടുതൽ ആളുകളെ ആകർഷിച്ചത് 'ഹാത്ത്ഫൂൽ' (Hathphool) എന്ന സവിശേഷ ആഭരണ ഡിസൈനാണ്.പാരീസ് ഹോട്ട് കൂട്ടൂർ വാരത്തിൽ (Paris Haute Couture Week) വൻ ശ്രദ്ധനേടിയ ഈ ഡിസൈൻ അന്താരാഷ്ട്ര പോപ്പ് താരം റിയാനയും ബോളിവുഡ് നടി ആലിയ ഭട്ടുമടക്കം അണിഞ്ഞ് ട്രെൻഡായി മാറിയതാണ്. 1990-ൽ കോസ്റ്റ്യൂം ഡിസൈനറായി കരിയർ തുടങ്ങിയ കാലം തൊട്ടേ ആഭരണങ്ങൾ ഒരു വ്യക്തിയുടെ സ്റ്റൈലിനെ പൂർണ്ണമാക്കുന്നു എന്ന കാഴ്ചപ്പാടാണ് തനിക്കുള്ളതെന്ന് അദ്ദേഹം പറഞ്ഞു.  മൂന്ന് വർഷം മുൻപ് ആരംഭിച്ച തന്റെ ഹൈ ജ്വല്ലറി ബ്രാൻഡിന് വലിയ പിന്തുണയാണ് ആഗോളതലത്തിൽ ലഭിക്കുന്നതെന്ന് അദ്ദേഹം വ്യക്തമാക്കി.
ഖത്തറിലെ ശാന്തമായ അന്തരീക്ഷവും ഊഷ്മളമായ അതിഥിസത്കാരവും തന്നെ ഏറെ ആകർഷിച്ചുവെന്ന് മനീഷ് മൽഹോത്ര വ്യക്തമാക്കി. തനിക്ക് ഇവിടുത്തെ അന്തരീക്ഷം വളരെയധികം ഇഷ്ടപ്പെട്ടതിനാൽ യാത്ര ദീർഘിപ്പിക്കുകയായിരുന്നുവെന്നും അദ്ദേഹം കൂട്ടിച്ചേർത്തു.  
​ഭാവിയിൽ പാരീസ് ഹോട്ട് കൂട്ടൂർ മാതൃകയിലുള്ള ഫാഷൻ കളക്ഷനുകളും ഉയർന്ന നിലവാരമുള്ള ആഭരണങ്ങളും കൂടുതൽ വിപുലമായി ഖത്തറിലെത്തിക്കാനാണ് മനീഷ് മൽഹോത്രയും പങ്കാളിയായ രിദ്ധി മൽഹോത്രയും പദ്ധതിയിടുന്നത്.